Skeda ta’ żmien u progress dwar l-euro diġitali

Il-fażi ta’ tħejjija tal-proġett bdiet f’Novembru 2023 u qed tqiegħed il-pedamenti għall-ħruġ potenzjali tal-euro diġitali. Din tinkludi l-finalizzazzjoni tal-ġabra tar-regoli dwar l-euro diġitali u l-għażla ta’ fornituri li potenzjalment jistgħu jiżviluppaw pjattaforma u infrastruttura għall-euro diġitali. Il-fażi ta’ tħejjija tinvolvi ttestjar u sperimentazzjoni estensivi, kif ukoll skambji regolari mal-pubbliku u ma’ partijiet ikkonċernati oħra, biex jiġi żgurat li l-euro diġitali jissodisfa l-ħtiġijiet tal-utenti u r-rekwiżiti tal-Eurosistema.

Aħna niddokumentaw regolarment il-progress tal-proġett f’rapporti komprensivi.

F’Ottubru 2020, il-BĊE ppubblika rapport dwar l-euro diġitali li jeżamina l-ħruġ potenzjali ta’ munita diġitali tal-bank ċentrali — l-euro diġitali — mill-Eurosistema.

Disa’ xhur wara l-Kunsill Governattiv tal-BĊE ħa d-deċiżjoni li jniedi l-proġett tal-euro diġitali. Il-fażi ta’ investigazzjoni tal-proġett saret minn Ottubru 2021 sa Ottubru 2023 u kienet tinvolvi l-istudju ta’ għażliet ta’ disinn u mudelli ta’ distribuzzjoni f’kooperazzjoni mill-qrib mal-partijiet ikkonċernati bħal dawk li jfasslu l-politika tal-UE u l-parteċipanti fis-suq. Is-sejbiet iffurmaw il-bażi għad-deċiżjoni li titnieda l-fażi ta’ tħejjija, li bdiet f’Novembru 2023.

Ara u niżżel skeda ta’ żmien ta’ livell għoli għall-proġett

Id-deċiżjoni dwar jekk fl-aħħar mill-aħħar għandux jinħareġ euro diġitali se tiġi kkunsidrata biss fi stadju aktar tard, ladarba l-proċess leġiżlattiv tal-Unjoni Ewropea jkun tlesta.