De Woch up Platt in MV: Utbillung, Windrœ' un Leeder up Platt
Mihr Windrœ': De Nårichten ut Mäkelborg-Vörpommern in de Woch von denn 20. bet tau denn 26. Juli 2026.
Handwarkskåmers mellen: Utbillung in't Handwark is fröcht
Bi dat Handwark in Mäkelborg-Vörpommern gifft dat dütlich mihr niege Utbillungsverdräch as süss. Bet nu sünd 972 niege Verdräch in Handwarksbedriewen affschlotten. Dat sünd 11,2 Perzent mihr as letzt Johr üm disse Tiet. Besünners fröcht: Utbillungen in't KFZ-Gewarf as ok in'n Heizungs-, Klima- un Sanitärbereich. Gägenwärdig billen bi uns in't Land mihr as 2.400 Handwarksbedriewen bummelig 5.000 junge Minschen ut - 848 dorvon sünd Frugens.
Mihr Windrœ' in Mäkelborg-Vörpommern
In Mäkelborg-Vörpommern sünd in de iersten sös Månde von't Johr 37 niege Wind-Energieanlågen an't Nett gåhn. Dat sünd mihr as in dat vulle Johr 2025. Dormit gifft dat bi uns in't Land nu 1.851 Windrœ'. Bunneswiet licht Mäkelborg-Vörpommern dormit in dat ünnerste Middelfeld. De mihrsten Windrœ dreigen sik in Neddersassen. Dor gifft dat 6.251 Stück – mihr as dreimål so väl as bi uns.
Initiative in Griepswold: Behörden-Breiwen bäder verståhn
In Griepswold arbeiten Mitarbeiders ut de Verwaltung, Språkwetenschaftlers un Minschen ut de Stadt doran, Behördenspråk klorer in Wür' tau fåten. Dorför dråpen se sik in Arbeitsgruppen an't Alfried-Krupp-Wetenschaftskolleg. Dat Problem: De Behördentexten möten de Börgers gaut verståhn un taugliek möten de vör Gericht standhollen. De Initiatoren hoffen, dat in'n Harfst 2027 de iersten språklich œwerhålten Behörden-Breiwen verschickt warden.
Fautball-Lannespokål: 36 Späle in de iersten Runn'
För denn Fautball-Lannespokål sünd de Späle von de iersten Runn' utlost worden. Dorför wiern de Nåms von binåh 100 Mannschaften in'n Lospott in. 36 Partien warden spält – an'n 22. un 23. August. De œwrigen Mannschaften kåmen dörch Frie-Los åhn Späl in de tweite Runn'. So ok Titelverteidiger Hansa Rostock – wenn de Lannespokål löppt, spält de Mannschaft in'n DFB-Pokål gägen denn VfB Stuttgart.
Einmål ein Leed up Plattdüütsch: Musik-Wettstriet „Plattbeats“ söcht Mitmåkers
De Musik-Wettstriet „Plattbeats“ söcht Muskanten ut ganz Nurddüütschland, de mit ein Leed mitmåken willen. Dormit ornlich väle dorbi sien kœnen, möten de Originål-Texten nich up Plattdüütsch sien. Plattschnacker helpen bi't Œwersetten un äuwen de Språk mit de Muskanten in. Upführt warden de Leeder up Platt bi dat Finåle an'n 14. November in Rostock. Ein Jury söcht de Siegers ut. Dat Priesgeld: All tauhop 1.500 Euro. All Informatschonen gifft dat up www.plattbeats.de
