"Rut mit de Spraak!" - Plattdüütsche Week in Rendsborg-Eckernföör
Vun'n 3. bit to'n 11. Oktober laadt Verenen, Institutschonen, Kulturinrichtens un Scholen to de Plattdüütsche Week in. 40 Veranstalten, Anbotten un Mitmaakakschonen för Groot un Lütt steiht op ehr Programm.
För de eerste Oplaag vun de Akschoonsweek in Rendsborg-Eckernföör ünner dat Motto "Rut mit de Spraak!" hebbt Gesa Retzlaff un Marie Sophie Koop gemeensame Saak maakt: De beiden Leiderschen vun de Nedderdüütschzentren in't Land deelt sik sotoseggen de Kreis, en Deel liggt in Sleswig, de annere in Holsteen.
Jedeen kunn wat anbeden för't Programm
"Wi hebbt Breven an de Ämter schreven, dat hett Gesa maakt. Ik heff denn so'n Verdeeler opboot mit de helen Verenen, de ik so in't Nett funnen heff, heff de all anschreven, 'Maakt doch mit! Hebbt ji Lust, wat antobeden in uns Plattdüütsche Week?'", vertellt Marie Sophie Koop vun't Zentrum in Mölln.
Un de Resonanz op ehr Anfragen weer groot: 40 Programmpunkte sünd tosamenkamen, för Groot un Lütt, för Spraakinstiegers un -kenners. All anbaden vun engageerte Lüüd ut Rendsborg-Eckernföör, de Bock hebbt op Plattdüütsch.
Optakt mit Godewind un Nedderdüütsche Bühn
To'n Optakt gifft dat in't Hoge Arsenal in Rendsborg en Uttuusch mang de natschonalen Minnerheiten, an'n Namiddag denn de offitschelle Anfang vun de Plattdüütsche Week mit Musik vun Godewind un mit Schirmherrin Sabine Mues, de Präsidentin vun'n Kreis.
"Wi hebbt uns dor dacht, wi haalt en poor vun de Akteuren mit op de Bühn. Dat heet, de Lüüd, de vorbikamt, de köönt denn so'n lütten Inblick al kriegen, wat dat so in de Plattdüütsche Week to beleven gifft", künnigt Marie Sophie Koop an.
Vun Gottsdeenst över Stadtföhrens bet Kinnerkino
Un to beleven gifft dat ene Mass: Gottsdeensten to Oorndank, Baden in't Holt, Bingo op Platt, interaktive Stadtföhrens, Spraakkursen - üm blots en lütten Indruck to geven.
"Wi hebbt ok för de Lütten wat dorbi, to'n Bispeel en Lesen vun de Dree Fraagteken Kids", so Marie Sophie Koop. "Oder en hele Stadt as Eckernföör maakt mit un seggt 'So, wi bespeelt dat hele Raathuus!' Dor gifft dat denn en Quiz, wat to't Klütern för de Lütten un so wieter."
Vele vun de Anbotten köst nix, man för enkelte Programmpunkten mutt een sik anmellen oder Koorten köpen - un kann denn beleven, wo lebennig un inspireren de Plattdüütsche Spraak in Rendsborg-Eckernföör ween kann.
