De Woch up Platt in MV: Wåhlen, Draugen un ein Räkenzenter
NDR Wahl-Navi online: De Nårichten ut Mäkelborg-Vörpommern in de Woch von denn 24. bet tau denn 30. August 2026.
Weckern wählen? Wahl-Navi un Wahl-O-Mat helpen tau entscheiden
Vör de Landdachswåhl an’n 20.September kœnen sik Wählerinnen un Wählers nu doröwer informieren, wat de Parteien un Kannedåten nipp un nau för Instellungen hebben. För dat NDR Wahl-Navi kunnen de, wecke wählt warden willen, ehre Meinungen tau Frågen von de Lannespolitik up eine Skalå von ein bet söss inordnen. 200 von de alltauhop mihr as 300 Kannedåten hebben mitmåkt. Wat dor rutkeem, is nå Wahlkreisen un Parteien sortiert, ein kann dat åwer ok frie dörchsäuken. Tau finnen up www.ndr.de/wahlmv un in de NDR MV APP. Ok frisch online is de so nöömte Wahl-O-Mat – ein Projekt in Kommün von Bunnes- un Lanneszentrale för politisch‘ Billung.
Nieget Räkenzenter: Insatz von Milliarden plant
In Dummerstorf bi Rostock sall ein bannig groots Räkenzenter entståhn. De Bu hett na NDR Informatschonen einen Wiert von 5,6 Milliarden Euro – bugen will ein Hannelsünnernähmen ut Neckarsulm in Baden-Würtemberg. Tau dat hüren de Käden Lidl un Kaufland. De Bu von disse däächte Anlach künn ok ein bannigen Upschwung för Wind- un Sünnenenergie bedüden. Dat Räkenzenter bruukt väl Strom – in Mäkelborg-Vörpommern hebben wi dissen – åhn lange Leitung. All nu måkt dat Land mihr Strom, as wi verbruken.
Buckelwål: Draugen gägen Mitarbeiters von‘t Meeresmuseum Stralsund
In Vörpommern ermittelt de Polizei, wieldat - as dat utsüht - Mitarbeiters von dat Düütsche Meeresmuseum Stralsund hart draucht worden is – wägen de Instellungen von de Wissenschaftlers dortau, woans’n mit denn up Sand liggen Buckelwål vör Poel har ümgåhn süllt. Dorbi hebben Lü föddert worden, dat Museum dåltaubrennen orrer dat de Mitarbeiters „in de Höll stranden süllen.“ Ok mit Muurd wier draucht worden. Disse Boshaftigkeiten harrn anfungen, as dat Meeresmuseum un anner Facklüd dortau råden hebben, denn Wål vör de Insel Peul in Rauh starwen tau låten.
Pries wunnen: Wo klimafründlich sünd Dosen, Tetrapacks un Pappkartons?
De Niegenbramborger Student Lennart Standtke kricht för siene Masterarbeit denn Düütschen Verpackungspries in de Kategorie Nåwuss. Mit bloots ein Foto kann hei rutfinnen, wo klimafründlich Verpackungen von Läwensmiddel sünd. Eine künstlich‘ Intelligenz nimmt up, wat för Material dat is un woväl dat weicht. Dorut beräkent dat System denn CO₂-Wiert. Nå sien Masterstudium will de Erfinner ein Startup-Ünnernähmen grünnen.
Billjett frie: Besäukerrekord in’t Staatlich‘ Museum Schwerin
In’t Staatlich‘ Museum Schwerin würd in diss Woch de 100.000. Besäuker siet de Weddereröffnung tellt – ein Mann ut denn Landkreis Rostock. Hei würd dorüm mit ein Willkåmens-Gåf grüßt. Dat Staatlich‘ Museum wier vier Johren lang up Schick bröcht worden – för elben Millionen Euro. Siet de Weddereröffnung in’n verläden Oktober möten de Besäukers nich för ein Billjet betåhlen. Vör de Sanierung keemen üm un bi 30.000 Besäukers pro Johr.
