De Woch up Platt in MV: Wåhl, wenniger Kinner un ein 100. Gebuurtsdach
All Informatschonen tau Landachswåhl: De Nårichten ut Mäkelborg-Vörpommern in de Woch von denn 14. bet tau denn 20. September 2026.
Online, Radio, Fiernseihn: All Informatschonen tau Landachswåhl
Tau Landachswåhl an’n Sünndach hett de Nuurddüütsche Rundfunk in de verläden Wochen väle Informatschonen tausåmmenstellt – tau finnen ünner www.ndr.de/wahlmv. Bi’t „NDR Wåhl Navi“ kœnen sik Wählers düchtig künnig måken, weck Meinung de Kandidåten tau bedüdende politische Themen hebben. Dorœwer rut sünd ünner annern de Fiernseih-Diskuschonen un Interviews von de Spitzenkandidåten online stellt. An’n Sünndach bericht’ de NDR utföhrlich in’t Radio, in’n Fiernseihn un ok Online œwer de Hinnergrünn’, de iersten Hochräknungen un natürlich œwer dat wat bi de Wåhl rutkåmen is.
In M-V kåmen ümmer wenniger Kinner up de Welt
De Geburtentåhl is in dat ierste Halfjohr so deip afrutscht, as nie nich tauvör. Dat seggen de aktuellen Tåhlen von dat Statist’sche Amt. Twischen Januor un Juni sünd bi uns nipp un nau 3.999 Babies buurn, bummelig 160 wenniger as in dat ierste Halfjohr 2025. Dat is ein Minus von vier Perzent. Wenn dat so wieder geiht, künn dat sien, dat dit Johr bi uns in’t Land wenniger as 8.000 Kinnings buurn warden, so wennig as noch nie nich.
Schwerin: In'n Hushaltsplån 2027 fählen Millionen
In Schwerin ward all de Husholt för dat tokåmen Johr diskuriert. De Stadt will binåh 45 Millionen Euro mihr utgäben as se innimmt. Dat süht ein provisorisch Plån vör. Allein dit Johr draucht de Lanneshauptstadt ein Minus von bettau 21 Millionen Euro båwentau. Oberbörgermeister Ehlers von de CDU süht dorin ein Problem, dat all Kommunen bedråpen deiht. Hei föddert, von Bund un Land, de Gemein finanziell mihr tau ünnerstütten.
Fautball: Hansa Rostock entlött Trainer un gewinnt
Fautball-Drittligist Hansa Rostock hett sik disse Woch von sien Chef-Trainer Daniel Brinkmann trennt. Hei har de Rostocker in’n November 2024 œwernommen, dor leech de Mannschaft up denn 14. Tabellenplatz. Obschons sik de Club ünner Brinkmann fixing gaud entwickelt hett, hebben de Rostocker likers twei Mål dat grote Ziel verpasst: dat Tröchkåmen in de 2. Bunnesliga. Dat ierste Späl nådem Brinkmann wech wier, hett Hansa Rostock mit 3 tau 2 wunnen – gägen de tweite Mannschaft von den'n VfB Stuttgart.
100 Johr Reuter-Bühn: Ein Spältied vull Gebuurtsdachsgåwen
Mit ein Utstellung in’t Schlott gåhn an’n Sünnåbend de Fieern tau’n 100. Gebuurtsdach von de Schweriner Fritz-Reuter-Bühn los. Fieert ward de heile Spältied œwer: Mit ein grot Jubiläumsinszenierung von dat Stück „As in’n Häben“. Dorœwer rut sall dat ein grot Gebuurtsdachsgala gäben, dat Ohnsorg-Theoter ward in Schwerin tau Gast sien un ok olle Fiernsehupnåhmen von Stücke von de Reuter-Bühn warden wiest. Un NDR 1 Radio MV hålt dat Ensemble in'n November in de plattdüütsche Traditschonssennung „De Plappermoehl“.
