De Woch up Platt in MV: Wahl-Ümfråg, Appelaust un Milljonen för de Polizei
Hülpsgeld söcht: De Nårichten ut Mäkelborg-Vörpommern in de Woch von denn 31. August bet tau denn 6. September 2026
MV-Trend: SPD kümmt neger nå de AfD ran
Gaut twei Wäken, vördem bi uns de Landdach wählt ward, hålt de SPD up. Nå ein Ümfråg von Infratest dimap in’n Updrach von denn NDR kümmt de SPD up 32 Perzent. Sei licht dormit blots noch drei Perzentpunkten achter de AfD. De Linke kümmt nå de Ümfråg up elben Perzent, de CDU up acht. De Gräunen würrn mit fief Perzent gråd äben so nå denn Landdach intrecken, dat BSW würr’t mit vier Perzent dorgägen nich.
Dat Bugen hett anfungen: 100 Milljonen för niege Polizei-Gebüden
In Ueckermünn’ un Freeland hebben sei mit dat Bugen von twei niege Polizei-Gebüden anfungen. Beide Vörhebben hüren tau ein Bu-Programm buten de Reich, wat „Sœben up einen Streich“ heit. Niege Polizeigebüden sallen so ok in Woren, Gåd’busch, Bad Doberån, Sassnitz un Güstrow buucht warden. Kosten sall dat allens tausåmen 100 Milljonen Euro.
Hülpsgeld söcht: Jahnsportforum in Niegenbramborg möt up Schick bröcht warden
Olle Technik un dat Dack kaputt: Dat Jahnsportforum in Niegenbramborg möt up Schick bröcht warden. Kosten sall dat œwer denn Dumen mihr as 50 Milljonen Euro. Problem dorbi: De Stadt hett kein Geld nich dorför. Upstunns versäuken Verwaltung un Stadtpolitikers, Hülpsgeld uptaudrieben. Sei sünd bang, dat dat Hus taumåkt warden möt, wenn sei dat nich upmöbelt kriegen. Dat Jahnsportforum wier 1996 buucht worden.
Gägen denn Bunnestrend: Åft-Buern hoffen up gaude Appelaust
Bet tau 25.000 Tunnen Appels sallen bi uns dütt Johr aust’t warden. Dat wiern gaud 40 Perzent mihr as verläden Johr, secht dat Landwirtschap-Ministerium. Düütschlandwiet räken sei dorgägen mit ein Aust ünner denn Dörchschnitt. In Mäkelborg-Vörpommern bugen 44 Buernbedriewe Appels an, up gaut annerthalfdusend Hektar.
Bad Doberan: Heimatverband vergifft Ihrenpriese
De Heimatverband Mäkelborg-Vörpommern hett bi sien Johresdräpen in Bad Doberan siene Ihrenpriese vergäben. Utteikent würr ünner annern de Kunsthandwarkersch Ulrike Sulk; sei knütt de traditschonellen Fischerteppiche un lihrt anner Lüd in düsse Traditschon an. Ok Katja Zühlsdorf würr ihrt; sei richt’ dat Folklore-Danz-Festival in Ribnitz-Damgorden ut. Anner Priese güngen an den Bås von denn Verein „Dörpschaft Witzin“, an ein’ jungschen Heimatforscher ut Velgast un an denn Verein Sågen- un Märkenstråt Mäkelborg-Vörpommern.
