De Woch up Platt in MV: Tauväl Wåter, ein gauder Lihrer un de ierste Stiernenpark
Streiks in'n Nåhverkihr: De Nårichten ut Mäkelborg-Vörpommern in de Woch von denn 23. Februor bet tau denn 1. März 2026.
Wägen Tarif nich œwerein kåmen: Warnstreik in'n Nåhverkihr
Wägen Streik geef dat an'n Friedach in't heile Land Kuddelmuddel in'n Öffentlichen Nåhverkihr. De Gewerkschaft Verdi har de Mitarbeiders von de kommunålen Busbedriewe dortau upraupen. Verdi will ünner annern körtere Arbeitstieden un mihr Tauschlääch för Arbeit nachts orrer an de Wochenennen. De Arbeitgäwer meinen, dat is nich tau betåhlen.
Frostwinter geiht mit Versåpung tau Enn
Warm Wäder mit dullen Rägen hett Anfang von de Woch väl tau daun för de Insatzkräfte bröcht. Stråten sünd versåpen, Keller vulllopen, Schaulbusse tau låt fohrn orrer utfollen. Up Rügen hett de Polizei wohrschucht, dat von de Steilküst wat afbräken künn. In Bentwisch mössten Füerwehrlüd un Hülpslüd von't THW mihrere Millionen Liters Wåter afpompen - dor kunn bi ein'n Båhndamm dat Wåter nich aflopen.
"Düütscher Lihrkräftepries": ein' von de besten kümmt ut Demmin
Toni Fischer von de Regionålen Schaul "Fritz Reuter" in Demmin is mit denn Düütschen Lihrkräftepries utteikent worn. In de Kategorie "utteikente Lihrkraft" is hei ein von teihn Priesdrägers ut heil Düütschland. Denn Pries vergäwen de Düütsche Philologen-Verband un de Heraeus-Billungsstiftung. Dat wichtigst, wat för denn Pries tellt, is, dat de Lihrer un de Schäuler sik gaut verståhn. Fischer is Vertrugenslihrer un so ein wichtig' Anspräkperson an de Regionale Schaul in Demmin.
Düsternis bewohren: Ierst' "Stiernenpark" in MV
De Naturpark Nossentiner/Schwinzer Heid" dörf nu amtlich denn Nåmen "Internatschonåler Stiernenpark" drägen. Dat is de ierst von disse Oort in Mäkelborg-Vörpommern. Üm denn Titel tau kriegen, hebben Gemeinden ünner annern 600 Stråtenlampen so ümrüst't , dat sei nich so väl Licht in de Ümgägend afstråhlen. Dorœwerrut hett de Naturpark Stiernenführer utbillt un Stiernkieker-Plätz' inricht'. Rund üm de Welt setten sik 230 Uurte as Stiernenparks dorför in, dat de Nachthimmel düster blifft.
Plattdüütsch' Wuurt von't Johr 2026 söcht
Von 1. März an ward dat Plattdüütsch' Wuurt von dat Johr 2026 söcht. Un twors in drei Kategorien: näben dat schönst' Wuurt ward de schönst plattdüütsch' Rädensoort söcht. Båbentau sall funnen warden, weck Wuurt niech in de Språk upnåhmen warden sall. Bet tau denn 31. März kann jedein siene Vörschlääch inschicken - up de Internetsiet von't Fritz-Reuter-Literaturmuseum Stemhagen. Dat Museum veranstalt' denn Wettstriet in Kommün mit denn Heimatverband Mäkelborg-Vörpommern.
