De Woch up Platt in MV: Strom-Milliarden, minner Muurschutz un 'n Bild
Ein Baselitz tau't Jubiläum: De Nårichten ut Mäkelborg-Vörpommern in de Woch von denn 18. Mai bet tau denn 24. Mai 2026.
20 Milliarden Euro för Stromnetten in Mäkelborg-Vörpommern
Mäkelborg-Vörpommern måkt middewiel väl mihr Strom vun Wind un Sünn, as dat Land sülfst bruken kann - bloots ein Viddel von dissen Ökostrom ward in't Land verbruukt. Dorför, dat de Strom, de œwerblifft in anner Deile von't Land œwerdrågen warden kann, möten Leitungen un Ümspannwarken buucht warden. De Netten-Bedriewer 50 Hertz will dorför in de taukåmen fief Johren 20 Milliarden Euro insetten. Allein von de Windparks upde Ostsee vör Mäkelborg-Vörpommern sall in twei Johren bi ein Gigawatt in dat düütsche Nett rinleit't warden - binåh soväl, as ein middelgrot' Atomkraftwark liefert.
Minner Muur-Schutz in't niege Klimåschutzgesetz
De rod-rode Lannesregierung schafft ein zentrålet Ziel von ehr Klimåpolitik af. Nådäm kœnen Muure in Mäkelborg-Vörpommern ok nå 2045 wieder dat Wåter aftreckt warden. In de niege Verschion von dat Klimåschutzgesetz heit dat nu bloots noch, dat Land will sik dorför insetten, dat dat Drööchleggen von Muure uphollen ward. Dat is åwer von Rechts wägen nich verbindlich. Dröge Muure gellen as ein von de gröttsten Produtschenten von CO2, wat dat Klimå schåden deit.
Nix funnen in Plåte: 20.000 Euro för Henwiesen, de tau denn Goldschatz ledden
Nådäm Insatzkräften vör twei Wochen in Plåt bi Schwerin nix von denn Goldschatz ut Manchingen funnen hebben, is nu 'ne Belåhnung utlåft. 20.000 Euro sall dat gäben för Henwiesen, de dortau ledden, dat de Goldmünzen funnen warden. Vör mihr as drei Johren is ut dat Kelten-Römer-Museum in Manching in Bayern ein Goldschatz klaut worn, denn dat blot einmål in de Welt gifft. De as Deiwe Verdächtigen sünd schnappt, ein Deil von dat, wat sei klaut harn, is bettau nich funnen. All tweimål hebben de Ermittlers Hus un Hoff von denn Hauptverdächtigen dörchsöcht – åwer kein'n Erfolch hatt.
Düütsche Senioren-Meisters bi't Danzen kåmen ut Mühl Rosin
Dat Danzpoor Anja un Christian Platz hett sienen Düütschen Meistertitel bi't Danzen verdeffendiert. Bi de Düütschen Meisterschaften in Darmstadt kunnen de beiden von'n TSC Nuurdlicht Rostock sik gägen teihn anner Pooren in de Standard- un Latiensch-Kombinatschon bi de Senioren dörchsetten. De Lihrerin un de Dokter kunnen all Dänz winnen un so, as in de Vörjohren, denn Meistertitel nå Mäkelborg-Vörpommern hålen.
300 Johren Seemannskirch: Reeller Baselitz för 72 Stunnen in Prerow
Bet Måndach is in de Seemannskirch in Prerow ein Originål-Bild tau seihn von denn Måler Georg Baselitz, de Enn April storwen wier. Dat drei mål vier Meter grote Wark "Mien Vadder süht ein'n Engel" geiht trüch up dat Besinnen up de Kinnertiet von denn Måler. In Prerow hett de Fomilie Baselitz ümmer wedder ehren Sommerurlaub verbröcht. Georg Baselitz gellt allerwärts as ein von de bedüdensten Måler ut uns' Tiet. Mit de Aktschon "Georg Baselitz - 72 Stunnen nonstop in Prerow" fangen de Fieern tau denn 300. Geburtsdach von de Seemannskirch an.
