De Woch up Platt in MV: Schaulen, Nandu-Jacht un Hanse Sail
Camping-Urlaub un Traditschon-Sailschäpen: De Nårichten ut Mäkelborg-Vörpommern in de Woch von denn 03. bet tau denn 09. August 2026.
Schaulen warden för't niege Schauljohr up Schick bröcht
In de Sommerferien gåhn väle Schauldräger bi, üm de Schaulen in't Land up Schick tau bringen un väle Såken niech un frisch tau måken. Ünner annern warden Schaulstuben streken, Fautboddens niech måkt, de digitale Infrastruktur utbuucht un technische Anlågen upfidummt. Dormit Schäulers in Taukunft buten beter vör de Sünn schütt sünd, warden in Swerin an ein Reich von Schaulen niege Schaddenspenners upbuucht. De Landkreis Vörpommern-Rügen lött denn Belåch von Fautboddens uparbeiden, dormit Schäuler dorup nich mihr so dull utrutschen kœnen. In'n Landkreis Mäkelborgsche Seenplatt hebben sei vör allen ein Ooch up Toletten un Waschbecken in de Schaulen.
Kuntrullen gägen Lüd, de tau fix fohren
Düsse Wäk is up de Stråten von Mäkelborg-Vörpommern mihr blitzt un kuntrulliert worden as sünst. De Lannespolizei secht, sei wull mit de Akschon wat gägen Lüd utrichten, de tau fix fohren un sik upsternåtsch verhollen. In düsse besünnere Kuntrullwäk haren de Schandarms dat dorüm för allen up Råser un Drängler afseihn, denn de sorgen ümmer noch för de mihrsten Unfäll, secht de Polizei. De europawiede Kuntrullwäk gifft dat tweimal in't Johr.
Rägeln för Nandu-Jacht verännert
In Nuurdwestmäkelborg gifft dat ümmer weniger Nandus in friege Wildbåhn. Dorüm dörben de noch knapp 50 Diere nich mihr, as bettau, jåcht warden. Nandus, de öller as ein Johr sünd, dörben nu blots noch in't Winter-Halfjohr jåcht warden. So hett dat de Landkreis fastlecht. Diere, de jünger sünd, dörben dorgägen wiederhen dat heile Johr schåten warden, secht de Kreisjachtverband. Achter de niegen Rägeln stickt, dat de Bestand stabil hollen warden sall.
Camping-Urlaub in MV: So väl as nie vörher
In de iersten fief Månden dütt Johr hett dat up de Campingplätz in't Land mihr as ein Milljon Œwernachten gäben. Dat sünd so väl, as nie vörher. Dat hett de Tourismus GmbH so künnig måkt. All in all geef dat bet Enn' von'n Maimånd 9,57 Milljonen Œwernachten. Dat sünd 2,8 Perzent mihr, as verläden Johr tau desülwige Tiet - un dat, obschoons de Plätz för de Wågen an de Wåterkant un in't Binnenland in'n Schnitt dürer worden sünd. De halwige Camping-Ünnernähmen sünd ihrer taufräden orrer sihr taufräden, as dat Johr bettau lopen is. Ein Viddel süht dat ihrer leech.
Väle Traditschon-Sailschäpen up de Hanse Sail
Tau't 35. Mål richt' de Hansestadt Rostock de Hanse Sail ut. Üm un bi 120 Tradischon-Sailschäpen ut söben Länners sünd dorbi. Dat gröttste Schipp kümmt ut Holland: de 70 Meter lang "Gulden Leeuw". Ok ut Polen sünd ein Reich von Schäpen mit bi. Dat Land is na 2005 tau't tweite Mål Partnerland von de Hanse Sail. Verläden Johr hett ungefihr ein half Milljon Gäst de Hanse Sail besöcht.
