De Woch up Platt in MV: Recht up ein' Hortplatz, Geschicht tau't Anfåten
De Nårichten ut Mäkelborg-Vörpommern in de Woch von denn 29. Juni bet tau denn 5. Juli 2026.
Landdach secht Ja tau dat Recht up ein’ Hortplatz
Grundschaulkinners in Mäkelborg-Vörpommern hebben in Taukunft ein Anrecht up ein' Hortplatz för den heilen Dach. Dat gellt upstunns œwer blots för Kinners in de 1. Klass. Dorœwer rut sallen de Kinnergruppen in’n Hort un in de Kripp lütter warden. För't Uppassen up ehre Kinners in'n Kinnergorden un in'n Hort möten Öllern hiertaulann' nix betåhlen. Land un Gemeenen kost' dat üm un bi eine Milliarde Euro in't Johr, secht dat Bildungsministerium.
Nuurdstream 2: Bunnesafkatschåp klåcht Ukrainer an
Veer Johren nå de Anschlääch up de Nuurstream-2-Gasruhre hett de Bunnesafkatschåp nu einen von de Bedeiligten anklåcht. Sei schmitt denn Ukrainer Kriegsverbräken vör, babentau dat Utlösen von ein Sprengstoffexplosion un dat Kaputtmåken von Buwarke. De Anklåchte wier vörrig Johr in Italien fastnåhmen un later nå Düütschland utläwert worden.
Börgermeister von Swerin nu so richtig in't Amt
Sebastian Ehlers von de CDU is nu ok von Amts wägen de niege Oberbörgermeister in Swerin. Düsse Wäk hett de 43-Jöhrige siene Ernennungsurkunn' ünnerschräben. Måndach fangt hei mit siene Amtsgeschäfte an. Ehlers is söss Johren Stadtpräsident in Swerin west. Dat Amt œwernimmt nu sien Wedderpart ut'n Wåhlkampf, Mandy Pfeifer von de SPD.
Rühn erfolgriek bi denn Wettstriet "Uns’ Dörp hett Taukunft"
De Gemeen Rühn in’n Landkreis Rostock hett bi denn Bunneswettstriet "Uns Dörp hett Taukunft“ ein Sülwermedalje wunnen. Dorœwer rut hett Rühn ein von söss Priesen buten de Reich krägen. Låwt wür besünners dat Kloster, as Lüchttorm in de Ümgägend för Wirtschap, Kultur un soziale Såken. Dat Priesgeld allens tausåmen: 13.000 Euro. Beworwen harrn sik üm un bi 1.200 Dörper. Rühn is de einzig Uurt ut Mäkelborg-Vörpommern, de in denn Wettstriet utteikend worden is.
Stier dröppt Griep: "Festival œwer de Lannesgeschicht" in Borth
Ein Festival œwer de Lannesgeschicht ward morgen in Borth rund üm denn Papenhoff fiert. Mitarbeiders ut Museumshüs, Archive, Vereene, Heimatstuwen, Bäukerien, Gedenkstäden un Forschungsinrichtungen stellen dorbi ehre Arbeit vör. Dat Motto: "Stier dröppt Griep. Lannesgeschicht tau'n Anfaten!" Plånt sünd ünner annern Vördrääch, Live-Musik, ein Diskuschonsrunn’ un ein szenische Läsung. För't Kinnerprogramm sorcht dat Bibelzentrum in Borth.
