De Woch up Platt in MV: Protest, niege Börgermeister un dat Filmkunstfest
Hölpslüd beennigen Insatz för den Wallfisch: De Nårichten ut Mäkelborg-Vörpommern in de Woch von denn 27. April bet tau denn 03. Mai 2026.
Bargen von den Wallfisch: DLRG-Hölpslüd beennigen Insatz up Poel
Nådem dat de strannte Buckel-Wallfisch vör Poel barcht worden is, hebben sik de ihrdenamtlichen DLRG-Hölpslüd von dat Eiland verafscheed. Mit bet tau 38 Kierls un Frugens un söben Bö’ wier de Düütsche Läbensrettung-Sellschap twei Wäken up Poel. För de besünnere Rull von de DLRG bi dat Bargen von den Wallfisch hebben all, de dorbi wiern, gaude Wür’ funnen. Ümweltminister Backhaus säd: „Åhn de DLRG harrn wi dat nich henkrägen.“ Un de privaten Hölpslüd säden, de DLRG hett Struktur in den Insatz bröcht.
Nich väle Wählers bi de Stichwåhl in Swerin
Sebastian Ehlers von de CDU is de niege Oberbörgermeister in Swerin. In Wismer ward Frank Junge von de SPD in Taukunft de Bœwelste von de Stadtverwaltung sien, un in Ueckermünn’ Tino Spiegelberg, de åhn Parteibauk anträden wier. All drei Börgermeisterposten sünd ierst bi Stichwåhlen rutkåmen. In Swerin hebben blots 41,6 Perzent von de, de wählen dörften, ok afstimmt. Blots 2008 sünd noch weniger Lüd tau Wåhl gahn.
Nå dat Dichtmåken von Statschonen: Protest an’t Krankenhus in Crivitz
In Crivitz ward wedder œwer de Taukunft von dat Krankenhus diskuriert. Anfang von’n Ostermånd sünd dor de Statschonen för Orthopädie, Chriurgie un de Nootupnåhm dicht måkt worden. Dat süht so ut, dat 73 von de üm un bi 200 Mitarbeiders vör de Dör sett warden orrer an anner Standüürt warken möten. Dorgägen gifft dat Protest. Siet gaud fief Johrn hürt dat Krankenhus tau denn Klinik-Verband von den Landkreis Ludnlust-Parchen.
Wåter-Wetenschåp: Öllste düütsche Lysimeter-Anlåch ward niech måkt
Dormit Forschers verståhn, woans sik Rägenwåter in de Ierd verhöllt, je nadem, wat för Bodden dat is, gifft dat Lysimeter: Dat sünd heil grote Zylinner, de in de Ierd inbuddelt warden. Dat öllste Lysimeter von Düütschland steiht siet mihr as 50 Johren in Grot Lüsewitz bi Rostock un ward upstunns up Schick bröcht. Kosten sall dat üm un bi 750.000 Euro. De Anlåg spält dörch, woans Wäder un Klima sik up dat Wåter in de Ierd utwirken. De Daten warden ünner annern von Landwirtschaft-Forschers brukt.
Mihr as 100 Filme mit Welt- un Düütschland-Premieren bi dat Filmkunstfest
An’n Dingsdach fangt in Swerin dat 35. Filmkunstfest an. Tau seihn sünd 118 Filme mit 16 Welt- un 18 Düütschland-Premieren. Island ward dat Gastland sien, un Armin Mueller-Stahl kricht denn Ihrenpries „Güllen Oss“. In de Reich „NDR Spezial“ ward ünner annern de Dokumentar-Striepen „Warum wir wurden was wir sind“ von Steffen Schneider wiest. Dor dreiht sik dat üm ein besünneres Forscherprojekt, dat all in de 70er Johr anfungen hett un wat doröwer lihrn sall, wat dat mit dat Wäsen von uns Minschen up sik hett. De Film löppt taukåmen Dunnersdach an’n Åbend Klock söss.
