De Woch up Platt in MV: Polizei-Quittungen, Schwienswåle un ein Schatz
Nix funnen bi’t Schatz säuken: De Nårichten ut Mäkelborg-Vörpommern in de Woch von denn 4. Mai bet tau denn 10. Mai 2026.
Landdach beschlött Ännerungen för’t Bugen
Bugen in Mäkelborg-Vörpommern sall lichter warden. Ünner annern gellen Bugenähmigungen nu länger as vördäm, Niech Buwarke dörben dichter bi Grundstücksgrenzen ståhn un Garåschen un Schuppens bet 40 Quadråtmeters möten gor nich mihr genähmigt warden. Dat hett de Landdach beschlåten - mit de Stimmen von de SPD; de Linken un de Gräunen. De annern Fraktschonen hebben sik enthollen.
Polizei dörf nu mihr
De Polizei in Mäkelborg-Vörpommern dörf von nu an infacher as bet nu Handys uurten un ok bi’n Notraup direktemang up de Positschonsdåten taugriepen. Dat steiht in dat niech rägelt’ Säkerheits- un Uurdnungsgesetz von’t Land. Ok niech is, dat de Schendarmen bi Personenkontrullen ein Quittung utschrieben möten. Dor sall ok upståhn, worüm kontrulliert worn is. Achtergrund dorför is, dat ofteins Minschen åhn Grund kontulliert warden, blot dornå, woans sei utseihn un dat annåhmen ward, dat sei nich düütsch orrer dat sei Migranten sünd.
Nix funnen bi dat Säuken nå dat Kelten-Gold
Disse Woch hebben Ermittlers in Plåt bi Schwerin all wedder nå denn in Bayern klauten Gold-Schatz söcht. Up ein 6.000 Quadråtmeter grot Grundstück schnoperten speziell utbill’te Hunnen un dat wür schwore Technik un ein Röntgenscanner insett’. Funnen wür de Schatz liekers nich. De besteiht ünner annern ut 411 Goldmünzen – 2100 Johren olt. Vier Inbräkers sünd för dissen Klau all afurdeilt.
See-Forschung: Elektronik wohrschuucht in Schwienswål-Språk
Forschungslüd ut Dänemark un Düütschland willen dorför sorgen, dat Schwienswåle in de Ostsee nich mihr so oft in Stellnetten dotblieben. Dorför sall ein Gerätschaft - so grot as’n Maiskolben - an de Netten anbröcht warden, de Schwienswål-Tön’ utsenn’t un so de Diere wohrschuucht. Jed’ Johr warden an de düütschen Ostseeküst’ 50-60 Schwienswåle dot an Land späult. Bi väle Diere glööft’n, dat de as Bifang in Stellnetten ümkåmen sünd.
Fritz-Reuter-Ensemble Anklam stellt niege Sommer-Revue vör
Dat Fritz-Reuter-Ensemble Anklam hett mit sien Stück "De schwedsche Hiring" Premiere fieert. De 700 Taukieker hebben eine Revue seihn mit Folklore, modernen Danz, Akrobåtik un Schauspäl. Dat Reuter-Ensemble pläächt mit siene Stücken ünner annern Kultur un Traditschonen ut Vörpommern – up de Bühn ståhn Kinner un junge Lüd. Dat Stück ward nu bet Oktober wiest – ünner annern in Danzig, Hiringsdörp, Stolp un Wolgast.
Podcast tau denn Perzess wägen denn ümbröchten Fabian ut Güstrow
Un noch ein Henwies up uns’ Programm: De Perzess üm denn Dod von denn achtjöhrigen Fabian ut Güstrow ward von NDR Mäkelborg-Vörpommern begleit’ in denn Podcast: M-V in’n Fokus. De Reporters Denis Mollenhauer un Andreas Frost gäwen œwer de einzeln Perzess-Dåch Bericht.Tau Hüren in de NDR MV App, in de ARD Sounds App un œwerall, wo dat Podcasts gifft.
