De Woch up Platt in MV: Plääch, minner Kinner und Reuter-Festspäle in Stemhagen
Musik för de Heimatdichtersch: De Nårichten ut Mäkelborg-Vörpommern in de Woch von denn 15. Juni bet tau denn 19. Juni 2026.
Mihr Stütt för Verwandte: Lannes-Plääch-Plån vörstellt
Sozialministersch Drese hett ein’ Lannes-Pläch-Plån vörstellt. De stüert dorup hen, dat Minschen so lang as dat geiht tau Hus pläächt warden sallen. Dormit dat mœglich is, sallen Verwandte beter stütt warden. Doröwer rut sallen mihr Facklüd utbildt warden, ok ut dat Utland. Båbentau is plånt, dat Daten öwer de Tåhl un de Situatschon von Demenz-Kranke sammelt warden. De Lannes-Plääch-Plån is von Pläächweetenschaplers ut Köln un Frieborg utklamüstert worden.
Digitale Verwaltung: Dormit ein nich mihr nå’t Amt möt
Mäkelborg-Vörpommern will bet tau’n Märzmånd taukåmen Johr ein Reich von wichtige Leistungen bi de Verwaltung digital anbeiden – dormit de Minschen nich mihr so oft nå de Ämters hen möten. Tau’t Bispäl sall bi’t Ümtrecken denn dat Ümmellen von tau Hus ut mœglich sien, öwer ok anner Deinstleistungen, as Ünnerholts-Afschlach, Wåhngeld un de Grundsäkerung in’t Öller. Dat Ümstellen up Digital von dat Ümmellen kost’ üm un bi 300.000 Euro; betåhlen deit dat de Bund. Eigens wullen sei mit dat Digitalisieren all 2022 trecht sien.
Minner Kinner nu ok in Kinnergordens an de Seenplatt
In de Kinnergordens un Horte in’n Landkreis Mäkelborgsche Seenplatt gåhn ümmer weniger Kinner. De taustännige Dezernent secht, ein Viddel von de Inrichtungen in’n Kreis is nich mihr vull utlast’. Vör allen de Andeil von Kinners, de jünger as ölben sünd, ward weniger. Dorachter stickt, dat minner Kinner buren warden. In Fulenrost bi Malchin tau’t Bispäl besäuken blots ölben Kinners denn Kinnergorden, liekers 36 Plätz dor sünd. Nu säuken’s na ein Mœglichkeit, woans de Stuben, de nich mihr för Kinners brukt warden, in Taukunft nutzt warden kœnen.
Festspäle in Stemhagen: Ein Stadt fiert Reuter un de Museums-Klock
In Stemhagen löppt dat letzt Vörbereiden för de 66. Reuter-Festspäle. Von taukamen Friedach up an steiht de Stadt för drei Dåch in’t Teiken von nuurddüütsche Kultur: mit Literatur, Theoter, Live-Musik un ein Vulksfest mit Lichtspektakel un Füerwark. Ein Top-Termin is is de Inszenierung von Reuter sien „Ut de Franzosentied“, de von Börgers ut de Stadt spält ward. Fiert ward ok de Museums-Klock; sei is vör 125 Johrn inbuucht worden. De NDR ünnerstütt de Reuter-Festspäle in Stemhagen.
Gåf tau’n 150. Gebuurtsdach: Ein frisch Henkieken up Martha Müller-Grählert
De Uni Griepswold hett Lihrmaterial tau de pommersch Dichtersfru Martha Müller-Grählert rutgäben. Dorachter stickt ehr 150. Gebuurtsdach dütt Johr. Tau dat Material hürt ok ein Speigelschief mit niechschräben Musik tau Grählert ehr Riemels. Muskanten von de Band Seeside von den Pommerschen Diakonieverein hebben de Leeder in Noten sett un inspält. Musik un allens, wat dor achter stickt, wat dat Material, de CD un dat Warken bi de Proben angeiht, is in ein Klönkist tau hüren: in de NDR MV App, de ARD Sounds App un öwerall, wo dat Podcast’ gifft. Stichwurt: „Plattdeutsches aus MV“.
