De Woch up Platt in MV: Plääch, Dünger un Geld ut Sünn un Wind
Nägen Perzent bruken Plääch: De Nårichten ut Mäkelborg-Vörpommern in de Woch von denn 16. März bet tau denn 22. März 2026.
Beschlåten: Börger un Gemeinden sall'n von gräune Energie profitieren
Börger un Gemeinden sall'n in Taukunft mihr dorvon hebben, wenn vör Uurt Wind- orrer Solårparks entståhn. För jedet Megawatt Windkraft sall'n Bedriewer jedet Johr 5.000 Euro an de Gemeinde utbetåhlen un noch eins 5.000 Euro an de Börger. Dat hett de Landdach beschlåten. Bi ein Solåranlåchwarden 1.000 Euro per Megawatt fällig.
Krankenkass mellt dütlich mihr Lüd, de Plääch bruken
De Tåhl von Minschen in Mäkelborg-Vörpommern, de Plääch bruken, hett sik siet 2011 mihr as verduwwelt. Dat wiesen frische Tåhlen von de Barmer-Krankenkass. Vör 15 Johren brukten blots 67.000 Minschen Plääch, intwüschen sünd dat üm un bi 140.000 Lüd, de Hülp bruken - binåh nägen Perzent von de Minschen in M-V.
Veruurdnung uphåben: Dünger-Tied geiht los åhn Inschränkung för Gägenden, de belast’ sünd
De Buern in Mäkelborg-Vörpommern dörben düngern, so as ehr Planten dat bruken. De Inschränkungen för Gägenden, de besünners mit Nitrat belast' sünd, gellen in Ogenblick nich mihr. Dat Bunnesverwaltungsgericht har vördäm de bayerische Düngeveruurdnung kippt. As Reaktschon hett ok Mäkelborg-Vörpommern siene Veruurdnung utset't.
Studie wiest: Psychische Stråpåzen von Lihrerinnen un Lihrer nähmen tau
Tau wenig Facklüd, tau väl, wat ein upnackt ward un nich nauch Geld dorför: De Lihrer-Profeschon in Mäkelborg-Vörpommern hett sien'n Reiz verluurn. Dat wiest ein Studie von de Uni Göttingen. Dorför hebben's 2.000 Lihrerinnen un Lihrer in't Land befråcht. Vörstellt har de Studie de Gewerkschaft Erziehung un Wissenschaft.
Wolgast 2027: Ein Fest-Sommer för Philipp Otto Runge
In Wolgast sall taukåmen Johr an denn Måler, Schriewer un Wetenschaftler Philipp Otto Runge erinnert warden. Runge is 1777 in Wolgast buurn - sien Gebuurtsdach ward denn also tau'n 250. Mal fieert. In'n Sommer 2027 sall dat denn Utstellungen un Feste gäben, äwer ok wetenschaftlich' Uttuuschen. För de Vörbereidungen is extra ein Projektleiter instellt worden. Runge sien Geschicht "Von denn Fischer un siene Fru" is ein von de bekanntesten düütschen Märken.
Theoter un Hüürspäl: Frank Grupe ward mit Reuter-Pries iehrt
De Fritz-Reuter-Pries von de Carl-Toepfer-Stiftung geiht dit Johr an denn Schriewer, Œwersetter un Theotermåker Frank Grupe ut Hamborg. Dormit ward besünners sien Daun för de plattdüütschen Hüürspäle von NDR un Radio Bremen utteikent. Tau denn Pries gifft dat 10.000 Euro.
