De Woch up Platt in MV: Ostern, Tourismus un 'ne niege Bänk
Polen höllt Sprietpriesen dål: De Nårichten ut Mäkelborg-Vörpommern in de Woch von denn 30. März bet tau denn 5. April 2026.
Kirchen leggen dat Hoffen in ehre Osterbotschaften
De binåh 300.000 Christen in't Land begåhn disse Dåch ein'n von ehre hööchsten Fieerdåch - mit Messen, Gottesdeinsten un Andachten, åwer ok mit Osterfüer un tausåmen Eier säuken. Bi de Fieern von Gräundunnersdach, an’n Korfriedach bet Ostern ward an dat Starben un dat wädder Uperståhn von Jesus Christus erinnert. Denn Globen nå geiht dat an'n Gräundunnersdach üm dat letzt' Åbendmåhl, dat Jesus mit siene Jünger har, an'n Stillenfriedach üm Jesus sin Leiden un sienen Dod. An'n Ostersünndach ward denn fieert, dat hei von de Doden uperståhn is.
Saisonstart: Mihr as de Hälft von de Tourismus-Ünnernähmen will dit Johr de Priesen anhäben
Urlaub in Mäkelborg-Vörpommern ward woll ok disse Saison dürer. De MV-Tourismusgesellschaft hett 200 Ünnernähmen befråcht un 63 Perzent hebben secht, se will'n de Priesen antrecken. Ehr finanzielle Låch schätzen 26 Perzent von de Bedriewen as gaut bet sihr gaut in, 20 Perzent as schlicht bet sihr schlicht – mihr as de Hälft' licht mit "dörchwussen" orrer "neutrål" dortwischen.
Polen: De Staat måkt Sprit günstig
Polen will von Dingsdach an de Priesen för Benzin un Diesel orrich rünner setten. De Regierung secht, dat künn' pro Liter 28 Cent weniger warden. Dorför sall de Mihrwert-Stüer för Kraftstoff dütlich nå ünnen gåhn. In de Grenz-Regionen will'n de Bœbelsten von Polen sik den'n Tank-Tourismus besünners bekieken. Bettau is åwer nich plånt, Kraftstoff-Inköper - taun'n Bispill ut Düütschland intauschränken.
Saison up de Wåterstråten geiht los: Brüggen gåhn wedder up
Mit Saisonstart gåhn ok de Dreih- un Klappbrüggen in't Land wedder up. So warden tau'n Bispill de Brüggen in Malchow, Demmin, Loitz un Ueckermünn' wedder in Gang sett. Autofohrers möten dor nu wedder Tiet för't Täuben inplånen.
ARD-Serie inspiriert Warener tau ein niegen Uurt, üm sik tau dråpen
In Waren an de Müritz gifft dat nu 'ne so nömte Fründschaftsbänk. De Idee dortau keem dörch de ARD-Serie "Käthe und ich", de siet 2018 in de Stadt un ümtau dreiht ward. In ein Episod spält 'ne Fründschaftsbänk 'ne wichtig' Rull. Wiel Warener Stadtführersche un Stadtführers ümmer wedder fråcht warden nå Schauplätz tau de Serie, hebbens beschlåten, sülfst so 'ne Bänk trecht måken tau låten.
