De Woch up Platt in MV: Kraunen, Hülpsgeld för Festivals un ein still lecht’ Schipp
"Wissemara" dörf nich mihr bedriewen warden: De Nårichten ut Mäkelborg-Vörpommern in de Woch von denn 9. März bet tau denn 15. März 2026.
Taukunft von de Poeler Kogge "Wissemara" nich säker
Facklüd von de taustännige Berufsgenossenschaft hebben an dat Holt von de Poeler Kogge dullen Schåden faststellt. Up denn twintig Johren ollen Nåbu von ein historisch Hannelsschipp hebben sei Holtbück, Någelkäwers, Wörm un ein’ scharpen Holt-Swamm funnen. Dorüm dörf de "Wissemara " iertsmål nich mihr mit Urlaubers nå de Oostsee rutfohren. Dat wedder Upschickbringen von dat Schipp künn bet tau fief Millionen Euro kosten.
Hülpsgeld för fief Festivals
Fief Festivals in Mäkelborg un Vörpommern kriegen düt Johr Hüplpsgeld von’n Bund. Allens tausåmen sünd dat 127.000 Euro. Dorvon kriegen drei Festivals in’n Landkreis Ludwigslust-Parchim wat af, ünner annern de "Zwischentöne" in Lübz. An de Mäkelborgsche Seenplatt kriegen twei wat, dat "3.000-Gråd-Festival" un dat "KM 28 Forstfest". Up disse Oort sallen vör allen lütte un middelgrote Festivals ünner de Arms griepen warden, heit dat von de Initiative Musik.
Kraunen kåmen nå Vörpommern trüch
De Kraunen kåmen langsåm ut ehr Winter-Quartiere in Spanien un Nuurdafrika wedder trüch nå Mäkelborg-Vörpommern. Väle kennen ehr as "Vågels von’t Glück" - sünnerlich gaud kann ein sei upstunns in dat "Kranorama" an’n Günzer See bekieken. Ok up Rügen, bi Prora in de Neech, sünd de iersten Kraunen tau’n Bräuden ankåmen. Johr för Johr bräuden bet tau 5.000 Kraunen-Pore bi uns in’t Land.
Noothülp-Helikopter in Pampow
De Plån, wo de viert Noothülp-Helikopter von’t Land sien Deinst daun sall, kümmt vöran. Standuurt ward de Landkreis Ludwigslust-Parchim. Denn Updrach dortau hett dat Land in heil Europa utschräben. Insett warden sall de Helikopter in Westmäkelborg un in de Lanneshauptstadt Schwerin. Up’t Johr räkend ward hei woll an de dusend Insätz fleigen, heit dat.
Caspar-David-Friedrich-Pries geiht nå Dresden
Ein Studentin ut Dresden, Hajin Jeong, kricht düt Johr denn Caspar-David-Friedrich-Pries. As Grund ward angäben, dat Jeong so as Friedrich, ehr Minschen un Diere in Bruchstücken von Landschaften sett, de dat so Ein tau Ein gor nich gifft, sünnern de ut väle Indrück tausåmensett un -sammelt sünd. De Künstlersch kricht in’n Oktobermånd, näben dat Priesgeld, ok ein Utstellung blots för sik in dat Caspar-David-Friedrich-Zentrum in Griepswold.
Af Mai wedder Tœch twüschen Hamborg un Rostock
Gaude Nåricht för all Fohrgäst von de Düütsche Båhn: Von de Midd von’n Maimand an, fohren twüschen Hamborg, Schwerin un Rostock de Regionaltœch wedder normal. Ok von Berlin nå de Oostsee sünd de Fierntœch denn wedder up de Streck ünnerwägens – de ein wennt is – œwer Schwerin.
