De Woch up Platt in MV: drei Wåhlen, ein Wal un niege Wür'
Stichwåhlen üm dat Börgermeisteramt: De Nårichten ut Mäkelborg-Vörpommern in de Woch von denn 20. April bet tau denn 26. April 2026.
Stichwåhlen in drei Städ' in't Land
In Schwerin, Wismar un Ueckermünde ward an'n Sünndach wedder wählt: In Stichwåhlen üm denn Posten von denn Oberbörgermeister in Schwerin kœnen de, de tau Wåhl gåhn, entscheiden, ob in Taukunft Sebastian Ehlers von de CDU orrer Mandy Pfeiffer von de SPD de Stadtverwaltung stüern sall. In Ueckermün'n treten de parteilosen Solokannedåten Karsten Berndt un Tino Spiegelberg gägeneinanner an, in Wismar ståhn Frank Junge von de SPD un Manuela Medrow von de AfD up denn Wåhlzeddel. All Informatschonen tau denn Utgang von de Wåhlen finnen Ji ünner www.ndr.de/mv
Interess an dat Schicksål von denn Wål vör Poel höllt
Ok in disse Woch hett dat, wat mit denn Wål passiert, de vör Poel fast licht, Millionen Minschen interessiert. Analysen wiesen, dat åwer ok Rechtsextreme un anner Verfassungsfiende sik de Situatschon tau nütt måken, üm Lœgen, Propaganda un Verschwörunggeschichten rüm tau tråtschen. Ehr Afsicht: Misstrugen gägen denn Staat un siene Verträders tau schüren. Verlässliche Informatschonen liefert de Nuurddüütsche Rundfunk in’t Rådio, in'n Fiernseher un ok in't Nett.
Billjetts warden dürer: Hoge Kraftstoffpriesen bremsen Schiffsverkihr
De hogen Kraftstoffpriesen warken sik ok ut up denn Schippsverkihr: Schippers, as de Reedereien Stena Line un TT Line hebben künnig måkt, de Priesen antauhäben. Ok sall'n de Fährschäpen nich so fix as süss führen, üm weniger Kraftstoff tau verbruken. Ok poor Utfluuchsschipper willen von Mai an up de Billjetts noch wat rupschlåhn.
Ingenieure ihren Bumeister von dat Münster von Doberån
As ierst Kirchenbu in Düütschland hett dat Münster in Bad Doberån denn Titel "Historisches Wahrzeichen der Ingenieurbaukunst" krägen. De ward von de Bundesingenieurkåmer vergäben. Dat Münster, in dat låte 13. Johrhunnert upbuucht, hürt tau de besünnern Bispäle von de Backsteingotik in denn Ostseerum, heit dat tau Begrünnung.
Plattdüütsches Wuurt von't Johr: Online-Afstimmung œwer niege Wür' geiht los
Von Måndach an kann jedein dorœwer afstimmen, weck Wuurt besünners passlich is, üm niech in de plattdüütsche Språk upnåhmen tau warden. De Jury von de Afstimmung för dat Plattdüütsche Wuurt von't Johr hett dorför ut all Insennungen fief Wür utwählt: „Lögendöntje“ – as Wuurt för Falschinformationen, „Batterieknoesel“ steiht för de E-Zigarett, „Zoomdösch“ sall dat Mäudsien nåh ein Videokonferenz beschrieben, „Tauhusmarachen“ de Arbeit in´t Homeoffice un „triddelfitzen“ sall dat Verhollen von Ein, de twors väl schnackt, åwer nich väl weit, in ein Wuurt fåten. De Afstimmung is tau finnen up de Internet-Siet von dat Fritz-Reuter-Literaturmuseum in Stemhågen.
