De Woch up Platt in MV: Besäuk, KI-Dåtenzenter un Russisch-Verdruss
Andenken an Müller-Grählert: De Nårichten ut Mäkelborg-Vörpommern in de Woch von denn 13. April bet tau denn 19. April 2026.
Verdeinstuurden vergäben: Bunnespräsident up Besäuk in MV
Bunnespräsident Steinmeier hett drei Dåch lang Mäkelborg-Vörpommern besöcht. Up dat Programm von dat düütsche Staatsoberhaupt stünn ünner annern de Besäuk von de Volkswerft, von de Utbillungsschaul för Marinesoldåten un ok von eine olle Spälkortenfabrik. Dorœwerrut hett Frank-Walter Steinmeier an Minschen ut Vörpommern denn Bunnesverdeinstuurden vergäben: an Harald Benke von dat Düütsche Meeresmuseum, an Birte Frenssen von dat Pommersche Lannesmuseum un an Marko Pantermöller von’t Festival Nuurdisch’ Klang.
Milliardeninvestitschon in Demmin: KI-Dåtenzenter plånt
Ein Dåtenzenter för Künstlich’ Intelligenz sall in Demmin entståhn. Ein Ünnernähmen stellt eine Investitschon von mihr as 1 Milliarde Euro in Utsicht. De Verwaltung klamüstert nu einen Bebuungsplån ut för dat Grundstück, dat de Stadt hüürt. De Wåhl föll up denn Standuurt Demmin, wieldat dor Strom ut Wind un Sünn gifft, secht de Geldgäwer.
Ostsee-Infrastruktur wohren: Düütsche Marine un Nato äuben tauhop
Up de Ostsee äuwen jüst nu de Düütsche Marine tauhop mit de Nato-Mackerschaft woans de wichtig Infrastruktur wohrt warden kann. Äuft warden ünner annern, woans de Antwuurt utseihn künn, wenn Ünnerwåterkåwel orrer de Inrichtungen för Windkraftanlågen angräpen wüürn. Dorbi warden ok technisch’ niege Såken utprooft – so as autonom schwemmen Fohrtüüch up un ünner’t Wåter. De Äubung sall bet tau denn 24. April gåhn.
Russischlihren geiht in MV wieder trüch: blot noch 100 Schaulen
De Russisch-Ünnerricht nimmt in Mäkelborg-Vörpommern einen Dålgang. Vör teihn Johren hebben noch 6.000 Schaulkinner de Språk lihrt, verläden Schauljohr wieren’t blot noch üm un bi 4.000. Ünnerricht’ wård de Språk noch an 100 Schaulen – dor steiht Russisch in’n Wettstriet mit Språken as Franzöösch,, Spånsch, Polnisch – åwer ok Latiensch un Nedderdüütsch.
Ihrentitel för Borther Börger: Andenken an Müller-Grählert
De Heimatdichtersch Martha Müller-Grählert is nu Ihrenbörgersch von ehr Gebuurtsstadt Borth. Bi eine Festveranstaltung an’n Friedach hebben de Verträder von de Stadt de Ihrenbörgerschaft posthum vergäwen. Ihrt worden sünd ok Sigrid un Hans Arlt – dorför, dat sei sik för dat Andenken an Martha Müller-Grählert insett’ hebben. De beiden hebben de Forschung üm Grählert besünners vöranbröcht un ok ein Museum för de Heimatdichtersch inricht’ – dorför wüürn sei in dat Ihrenbauk von de Stadt Borth indrågen.
