De Woch up Platt in MV: Båhn-Winter, Robben, Karneval un ein Adebor
Winter höllt Båhn-Bu up: De Nårichten ut Mäkelborg-Vörpommern in de Woch von denn 16. Februor bet tau denn 22. Februor 2026.
Winterwäder lecht Båhn-Bustell låhm
Dat Wedder-up-Schick-Bringen von de 280 km lange Båhnstreck Berlin-Hamburg ward nich tau rechte Tiet fardig. Schuld doran, so de Båhn, is de dulle Winter, so iesig wier de siet 15 Johren nich mihr. Bet tau 70 Zentimeter deip is de Bodden längs de Båhnstreck fruur'n. Dorüm kœnen taun Bispill keine Kåwels för wichtige Signålanlågen verlecht warden. Wann wedder Tœch up de Streck rullen, will de Båhn in de Midd von’n März-Månd mitdeilen.
Kegelrobben: Fischers will’n Geldstråf nich betåhlen
Dat Amtsgericht Strålsund hett gägen twei Fischers von Rügen Stråfbefähl erlotten – dorbi geiht dat üm de doden Keggelrobben. Lange Tied wier nich klor, worüm de ingåhn sünd. De Beschüllichten sall‘n, so dat Gericht, eine Rüs nich nauch afsäkert hebben. So kunnen Keggelrobben dor rinschwemmen. So sall’n de Fischers denn Dod von mindestens fief Diere hennåhmen hebben. Nu sall'n se ’ne Geldstråf betåhlen. Dorgägen hebben de Fischers Inspruch inlecht.
Ümtoch un scharpe Wür’: Karnevalstiet is vörbi
De Narrschen in't Land hebben disse Woch noch eins Karneval fieert. 35 Festwågens wieren tau'n Bispill Rosenmåndach in Feldbarch ünnerwägens west. Dutzende Lüd harrn vördäm up de Stråten Ies un Schnei wechrüümt. Tau’n Afschluss von de Karnevalstiet harrn denn CDU un AFD tau politisch’ Aschermittwochs-Veranstaltungen inlådt - nå Stralsund un Demmin.
Versäkerungsfall Kulturhus: Gericht wiest Klåch af
De Stadt Strasburg kricht nich mihr Geld von de Ostdüütsche Kommunålversäkerung, kort: OKV. So dat Urdeil von’t Landgericht Niegenbramborg. Hinnergrund is ein Striet dorœwer, ob dat Kulturhus in Strasburg, dat vör vier Johren afbrennt is – ok hoch nauch versäkert wier. De OKV meint: nee un hett 1,4 Mio. Euro an de Stadt betåhlt - de wull åwer 400.000 Euro mihr hebben un har klåcht. Nu is de Klåch afwiest worden.
Bringen se dat Vörjohr? Adebor-Dåm in Woggersin ankåmen
In Woggersin, dichting bi Niegenbramborg, is dit Johr de ierste Adebor seihn worden. De NABU-Beupdråchte Brauns hett denn NDR vertellt, dat sik dat üm ne Adebor-Dåm hanneln deit. Se hett ehr Nest up denn Kirchplatz von Woggersin upsöcht un bruukt nu Fauder. Naturfrünn' kümmern sik üm dat Diert.
