40 Johr Lachmöwen: Laboer Theater fiert Geboortsdag
De Anfang as lütte Laiengrupp, de Ümbu vun en Kinnergorrn to'n Theater, de Stormfloot, de vör poor Johr op'n Teppich stünn: Dat Lachmöwen-Theater in Laboe hett in 40 Johr al veel beleevt.
"Brandstiftung" heet dat Stück, mit dat de Laboer Lachmöwen in düsse Jubiläumsspeeltiet ringaht. Natürlich - ok in düssen Swank vun Günther Siegmund will junge Leevde sik Bahn breken. Wenn dor blots nich de Papa weer, de meent, sien Deern harr doch wiss wat Beters verdeent! "Ik will se blots seggen, dat mien Lieschen vun mi - schull dat würklich wat Ernstes mang de beiden ween - nich de Inwilligung kriggt!" - maakt Koopmann Dreyer, speelt vun Asmus Finck-Stoltenberg, kloor.
Wohre Theaterprofis mang de Ehrenamtlers
To ehrenamtliche Schauspelers as Asmus dat is, gesellt sik siet en Reeg Johren ok Vullprofis vun't Ohnsorg-Theater, de in dat Huus an de Kieler Föör noch de richtig schönen olen plattdüütschen Stücken spelen köönt, de de moderniseerte Speelplaan in Hamborg villicht vermissen lett. Een vun ehr: Heidi Mahler!
"Weil das Laienspieler sind, die tagsüber arbeiten müssen und voller Freude und Inbrunst abends plattdeutsch Theater spielen. Ich bewundere das ganz ganz doll", seggt se - un steiht vör luder Bewunnern denn ok gliek mit op de Bühn bi de "Brandstiftung".
De Baas is op un achter de Bühn vull in'n Gang
Hööftperson in't Stück is Paster Brandt, den se dat Huus ansteken hebbt, man de mit düchtig Slitzohrigkeit versteiht, ut de Saak Kaptaal to slaan. Lachmöwen-Chef Jan Steffen speelt em, een, de ok in't würkliche Leven weet, wo de Haas löppt.
Mit'n niegen Hüerverdrääg hebbt se eerst körtens ehr Theatergebüüd an sien Standoort sekern kunnt. In't Johr lockt se üm un bi 12.000 Tokiekers dörch de Döör. Un denn is dor noch de Blick na vörn:
Wi hebbt hier ja ok so'n poor Tourmanager, müch ik mal seggen, de hebbt al en Oog dor op hatt, un nu kiekt wi mal, wo wi hier wiederkaamt, ob wi hier lütte Afstecher maakt, de in't Land Sleswig-Holsteen sünd, un denn wüllt wi mal sehn, ob wi dor noch beten bekannter warrt för dat Land un dat mehr Lüüd denn eben hierher kaamt. Jan Steffen, Chef vun't Lachmöwen-Theater
Prominente Ünnerstütters graleert ok
Wokeen harr dat dacht, as sik 1986 bi de AWO poor Lüüd in Laboe to en lütt plattdüütsche Laienspeelgrupp tohoopfunnen, dat dor 40 Johr later nu so en Ohnsorg an de Kieler Föör ut worrn is, inklusive nu denn villicht ja ok Tourneebedriev. De Laden löppt.
"Weil wir alle gut drauf sind. Lachmöwen-arbeiten macht Spaß!", seggt Sabine Schlappkohl, de al eewig Tresen maakt bi de Lachmöwen. Se sorgt för Sekt, un de Lüüd dankt mit gode Wünsch. Mang de Gratulanten sünd ok gliek twee Ministerpräsidenten:
"Also ik wünsch mi, dat de ok 50 warrn un noch öller warrn. Aver dor gehört noch en beten wat dorto: Dat is de Ünnerstützung, de wi bruken, un nich blots op de Bühne, sünnern ok vun de Lüüd, de hier üm Laboe herüm wahnen doon ut de Probstei un mientwegen ok noch en beten wieder weg, un deswegen is dat ok so nootwendig, dat wi dor en Fördervereen för maakt hebben", vun den he sülvst de Schirmherr is: Peter Harry Carstensen, vörigen Ministerpräsident vun Sleswig-Holsteen.
Daniel Günther löövt de grootoordige Arbeit
Un de anner Ministerpräsident verleden Sünnavend bi de Geboortsdagsparty in Laboe, dat weer de aktuelle: Daniel Günther.
"Ich hatte versprochen, dass ich hier auf jeden Fall mal zugucke, mal hereinschnuppere, und ich mag ja auch persönlich gerne plattdeutsches Theater, aber ich finde, es ist ein wichtiges Kulturgut auch in unserem Land, etwas, was ja weit über die Region hinaus strahlt, und das wollt ich auch hier gerne zum Ausdruck bringen, gratulieren und sagen: Macht weiter so! Ihr macht eine großartige Arbeit hier für die Region und darüber hinaus!"
Wokeen hett denn nu dat Huus vun'n Paster ansteken?
So löövt de Lannsvadder de Laboer Bühn, op de nu Ohnsorglegenn Heidi Mahler in ehr Rull as ole Frau Facklam nödig wat loswarrn mutt: "Ik heff dat Huus vun den Herrn Paster in Brand steken. Hier sitt ik, ik kann nich anners."
Weer se nich in Würklichkeit. Seggt se blots, üm ehren Söhn to schulen, man ok de, kümmt rut, weer dat nich. Villicht weet blots de Paster, wokeen dor Füer püüstert hett. Man dat maakt he an'n Sluss alleen mit sien Herrn af...
Veertigsten Geboortsdag hebbt se fiert. Dat Jubiläumsstück "Brandstiftung" is noch to sehn bet Enn vun'n Oktobermaand. Un denn kiekt wi mal, wat se sik denn infallen laat, de Lachmöwen vun Laboe.
