Kolumne: "Plätten"
Bügeln ist für sie entspannende Me-Time und dem Putzen klar überlegen, findet Lina Martschin.
Annerletzt hebb ik so faken vun Lüüd höört "Plätten?! Neee wokeen maakt dat denn noch? Ik hebb nich mal mehr en Plättbrett oder Plättiesen!" Un ik fraag mi nu - nich, woans düsse Lüüd ehr Kledaasch schier kriegt - sünnern: woans spannt de denn ut?!
Geiht nix över Plätten
För mi is plätten mit Afstand op Platz 1 in de Huusarbeits-Hitlist. Bi'n Barg an knakendröög Blusen, Hemmen, wat nich allens: Dor geiht mi dat Hart op!
Wenn een nu ankamen würr un de würr seggen: hier, ik maak dien Huus rein, kümmer mi üm de Krömels op'n Bodden un de Hannafdrücken an de Finsterschieven, wenn du dorför mien Wäsch plätten deist - ik müss nich mal ene Sekunn lang överleggen!
As ene Meditatschon
Wenn ik Plättwäsch hebb, heet dat näämlich: Ik gah in uns Afstell-Wäsche-Kamer. Ik maak de Döör achter mi dicht. Maak mi en Podcast oder en Höörbook an - un kann afschalten. Ik stah dor denn un plätt vör mi henn un dat is herrlich warm vun't Iesen un dat rüükt jichenswo so heimelig un dat is reinweg meditativ!
Anner Lüüd gaht to't Yoga, ik gah plätten. Dat is mien Me-Time! Buten vör de Döör löppt de Alldag wieder, ik bün in mien egen lütte Kosmos.
Glücksgeföhlen ahn Enn
Un: An't Enn hebb ik ja sogor noch wat schafft! Düsse Foortgang to sehn, wenn't kien krusen Barg mehr is, sünnern allens akkraat op'e Hängers hangt, dat gifft denn de neegste Swung an Glücksgeföhlen.
Kann mi nüms vertellen, dat dat ok bi't stoffsugen oder Baadstuuv putzen funkschoneert.
Zum Podcast-Angebot der plattdeutschen Sendereihe "Hör mal 'n beten to"
Die plattdeutsche Morgenplauderei "Hör mal 'n beten to" gehört seit 70 Jahren zum Alltag in Norddeutschland. Hier werden die Wunderlichkeiten des Alltags betrachtet. So klingt es, wenn wir Norddeutschen uns selbst auf die Schippe nehmen - liebevoll bis spöttisch, selten mit dem Finger in schmerzenden Wunden, aber immer an Stellen, an denen wir kitzelig sind. Im Radio: werktags um 10.40 Uhr auf NDR 1 Welle Nord, um 11.50 Uhr auf NDR 1 Niedersachsen und um 13.20 Uhr auf NDR 90,3.
