Kolumne: "Leesrott warrn"
Anfangs fällt das Lesen schwer. Doch mit jeder Seite kehrt die Freude zurück, schildert Marie Sophie Koop.
Tick, Tack, Tick, Tack. Wörr de Klock nich ticken, ik wörr menen, de Tiet weer stahn beleven. Dat Book wiggt swoor in mien Hannen. Mien Ogen beweegt sik mit de Senelligkeit vun en Snick över de Sieden. Ik lees de Wöör, aver mien Kopp blifft leddig.
In twee Stünnen mutt ik los. Wo eenfach weer dat, dat Book wedder bisiet to leggen un noch op Social Media Videos to glupen. Aver jümmers, wenn ik doran denk, dükert een Satz vör mien Ogen op: 2026 - Leesrott warrn. Dammi, düsse goden Vörsätz. Wat heff ik mi dorbi dacht?
Dat duert, un denn geiht' doch ganz licht
Deep in mi weet ik dat nau: Ik will de Lust an't Lesen wedderfinnen. As Kind heff ik mehrere Dutz Böker in de Sommerferien leest. Jichtenswann is de Freid doran verloren gahn. Ik plinköög twee, dree Maal. De Wöör warrt scharp. Een Siet schafft. Kaam, noch een. Un noch een.
Mit jede Siet warrt dat denn lichter. Miteens stah ik baven op den roden Fels meern in de Noordsee. 1885. De Wind ümspeelt mien Gesicht. Ik holl den Hoot fast. Mien Kleed ruschelt mi üm de Been. Sülvst hier baven kann ik dat Soltwater rüken. En Mööv riddt op en Windbö. Ik bün en Fru, de nich in't Korsett vun de Tiet passt. Ik will över mi sülbst bestimmen. Ik do allens dorför.
Indükert in de Geschicht
Ding Dong. En Klock sleit. Mitmal düker ik op. Nu sitt ik wedder in de Wahnstuuv mit Book in de Hand. Wat weer dat? En Runners High - blots bi't Lesen?
Villicht is dat dat Patentrezept, üm en Leesrott to warrn: dörch de eersten Sieden quälen, de Freid kümmt mit de Tiet.
Zum Podcast-Angebot der plattdeutschen Sendereihe "Hör mal 'n beten to"
Die plattdeutsche Morgenplauderei "Hör mal 'n beten to" gehört seit 70 Jahren zum Alltag in Norddeutschland. Hier werden die Wunderlichkeiten des Alltags betrachtet. So klingt es, wenn wir Norddeutschen uns selbst auf die Schippe nehmen - liebevoll bis spöttisch, selten mit dem Finger in schmerzenden Wunden, aber immer an Stellen, an denen wir kitzelig sind. Im Radio: werktags um 10.40 Uhr auf NDR 1 Welle Nord, um 11.50 Uhr auf NDR 1 Niedersachsen und um 13.20 Uhr auf NDR 90,3.
