Råden un winnen: De Husupgåf ut de Plappermoehl ut Schwaan
In de plattdüütsch' Talkshow "De Plappermoehl" von NDR 1 Radio MV hebben de Moderatoren in jedein Sennung ein lütt' Husupgåf dorbi. Un ümmer is de Fråch: worœwer uns Plappermoellers hier räden.
As Mœhlendåler, also as'n lütten Pries, tau winnen gifft dat noch eins fief Exemplaren von denn Traditschonsklenner "Voss un Haas" för 2027. Dat hett ein Grund: Verläden Mal hebben wi so väle Antwuurten krägen as nienich un so hett de Redaktschon dacht: denn Klenner, denn willen de Lü hebben!
In September 2026 wier uns Plappermoehl in Schwaan tau Besäuk. Un dat is de Husupgåf - worüm geiht dat hier?
Susanne Bliemel (SB)
Thomas Naedler (TN)
TN: Weitst Du Susanne, hüt is mi so melanklöterich.
SB: Hest nix tau'n Äten krägen?
TN: Neeee… dat is dat nich. Mi fählt dat Licht.
SB: Hest' diene Strom-Räknung nich betåhlt?
TN: Dat ok, äwer dat is dat nich. Mi fählt dat Licht an Åbend un an Morgen. Ik heff dat so mocht, in'n Sommer: an Morgen hell, an'n Åbend hell… Dat wier schön. Un nu fangt dat all wedder an, dat de Dåch so düster sünd.
SB: So doof dat is, dat du trurig büst, so gaut passt dien Taustand tau dat Wuurt, dat wi säuken. Ik fang an: Dat, wat wi säuken, kann ein bruken, wenn dat düster is.
TN: Dat måch ik so an di - dat du in de düstersten Momangs noch ümmer wat Positivs finnst. Ik måk wieder: Dat, wat wi säuken, kannst hier in dat Kunstmuseum in Schwaan seihn. Up ein Bild von Rudolf Bartels hebben dat Kinner in ehre Hänn'.
SB: Kinner drågen dat, wat wi säuken, jedein Johr mit väl Freud dörch de Stråten - meist in Näwelmånd - wenn St. Martin kümmt.
TN: Dat, wat wi säuken, bammeln sik väle ok as Deko in ehre Goordens. Hütigendåchs väl mit Solar un LED.
SB: Un früher hebben de Schaffners bi de Isenbahn dat, wat wi säuken, an't Enn' von denn letzten Wagen hangt. In rod.
TN: Un dorüm seggen de Sportreporters ok hüt noch, dat ein Mannschaft, de in de Tabelle ganz ünnen steiht, dat de dat Ding, wat wi säuken, drächt.
SB: Töw man… is uns Husupgåf nich nu all tau licht? Hier in'n Saal sünd de iersten Lü all inschlåpen…
TN: Ja…. Nee. De möten wi wak måken. Denn wi säuken ja ein besünner Wuurt. Ein dat sik de Plattdüütschen anno dunnemals ut twei Wür tausåmen sett hebben - ein davon keem ut dat Französsche un dat anner is dat Wuurt för dat, wat mi fählt.
SB: Strom? Wat tau'n Äten?
TN: Oh manno… Susanne. Ik måk mi hier binnenwennig nåkend mit miene Harfstmelanklöterie un du måkst diene Witzen…
Licht! Mi fählt Licht! Aprospos: Tau licht wier uns Husupgåf villicht, wenn ik seggen wür, dat ein Kino in Niegenbramborg so heit, as dat Wuurt, dat wi säuken.
SB: Cinestar?
TN: Susanne!
SB: Thomas… is doch blots Spåß.
TN: Jaaaa, nee… nu is Schluss mit lustig. Ik bün säker, die Lü weiten nu all, wat wi säuken.
Un wenn dat so is, denn schriewen Sei dat up ein Kort an:
NDR 1 Radio MV
Postfach 11 01 44
19001 Schwerin.
E-Mail geiht ok, ünner plappermoehl@ndr.de - orrer: Sei schriewen dat glieks hier in dat Formular. Un för't Mœhlendaler winnen väl Glück!
Tied hebbens dorför bet tau denn 18. Oktober 2026.
