Wi snackt Platt: Tüdelband to Besöök un en Törn dör dat Havenmuseum
Bi "Wi snackt Platt" kiekt wi dütmal in't Düütsche Havenmuseum in'n 50er Schuppen vörbi. De ehrenamtlich Mitarbeiter Bernd Schramm nimmt uns mit op en ganz exklusiven Törn dör dat Schaudepot un vertellt dorvun, woans dat fröher mal in Haven togahn is.
"De Tüdelband" to Besöök bi de Mediengestalter-Azubis vun'n NDR
Wat plattdüütsche Pop-Musik angeiht, is de "Tüdelband" ganz vörn mit dorbi - un an'n Dingsdag, dor weern Mire Buthmann un Malte Müller bi uns bi’n NDR an’e Rodenboomchaussee to Besöök. Drapen hebbt se sik mit junge Lüüd, de bi’n NDR en Utbillen to’n Mediengestalter maken doot. Tohoop mit jüm kunnen de Azubis utprobeern, woans dat is, en Band optonehmen, se in’t rechte Licht to setten un ok to filmen. Wi harrn de Schangs, dor mal vörbitokieken. Snackt hebbt wi mit den NDR-Lehrjung Louis Steffens, man ok, kloor, mit de Tüdelband, de ehrn neegsten Optritt an’n Dunnersdag, den 24. September, bi en plattdüütschen Namiddag in't Gemeendehuus vun'n Hamborger Michel hett. Klock veer geiht dat los. Kössen deit dat nix, aver: en mutt sik bet bet Dunnersdag, den 18. September dorto anmellen. Ünner de Emailadress info@st-michaelis.de oder bi't Karkenbüro, Tel. 040/376 78-0.
Moderatschoon: Jan Wulf
