Aktualne powěsće:

Sakske knježerstwo je přihłosowało, zo přistupi Sakska towarstwu "Němski slědźenski centrum za twarjenje přichoda (DFZ Bau)". Kaž Budyski měšćanski zarjad zdźěli, je z tym puć swobodny za natwar slědźenskeje infrastruktury w Budyšinje. Za to chce Sakska 100 milionow eurow dać, kotrež přińdu z pjenjez za strukturnu změnu. Dalši partnerojo přichodneho slědźenskeho centruma su krajej Durinska a Badensko-Württembergska, uniwersity w Stuttgarće, Weimarje a Drježdźanach kaž tež Zwjazkowe ministerstwo za bydlenje a twarstwo. Wotpowědne towarstwo chcedźa hišće lětsa załožić. Centrum ma we wuskim zwisku z praksu nowe twarske materialije a technologije wuspytać a dale wuwiwać.

Płaćizna za drjewo k tepjenju je po słowach někotrych domoródnych lěsnistwowych zawodow w minjenych dźesać lětach wo něhdźe 40 do zdźěla 60 procentow stupała. Najbóle nastupa to dub, brězu a buk. Tole wobkrućištaj na naprašowanje Feliks Brězan w Rakecach a lěsniske předewzaće Heckl w Hohwaldźe. Porno tomu su płaćizny za twarske a industrijowe drjewo, kiž dodawa Clemens Brězan do rězaka, w běhu zašłych 30 lětach poměrnje konstantne wostali. Štomy w jeho lěsach wokoło Drěwcow a Delnjeho Wujězda podrubaja přewažnje pólscy sobudźěłaćerjo a firmy, kiž woža drjewo do susodneho kraja. Stupali su po měnjenju wšitkich naprašowanych kóšty za transport a energiju.

Ze serbskimi spěwami wotewri wčera dwójny kwartet chóra Lipy nowu wustajeńcu w klóštrje Marijina hwězda w Pančicach-Kukowje. "Zbrašenje. Žana hranica!" je hesło přehladki, kiž powěda wo nazhonjenjach ze zbrašenymi ludźimi. Wuchadźišćo je mnich Hermann Chromy, kiž njebě jenož ćežko zbrašeny, ale zdobom wuznamny srjedźowěkowski wučenc. Nimo toho rozprawjeja starši, kotřiž maja dźěći z handicapom, we widejach wo swojim swójbnym žiwjenju. Wustajeńca je hač do spočatka nowembra w klóštrje widźeć.

Tučasnje saněruje předewzaće AARSLEFF w Budyšinje a Hornjej Hórce roły a kanale za dešćikowu wodu a wotwodu. Kaž zdźěli zamołwity projektowy nawoda Thomas Tzschoppe, dźěłaja ze specielnej robotorowej techniku, kiž zmóžnja bjezkablowy přistup k rołam a kanalam w zemi. Tute wašnje zadźěwa harje a zanjerodźenju a nimo toho zalutuja kóšty za přidatne twarske dźěła. Předewzaće AARSLEFF z Drježdźan słuša danskemu koncernej, kiž wukonja najwšelakoriše twarske projekty po cyłym swěće.

Gmejnska rada w Bóšicach je wčera wobzamknyła, nětko tež zbytne ležownosće Wětrowskeje šamotownje za symboliski jedyn euro předać. Dźe na přikład wo parkowanišćo před něhdyšim zawodom, wjacore chódniki a płoninu stareje železniskeje čary. Ležownosć zawoda sameho běše so hižo před měsacami imobilijowej firmje ze sydłom w Berlinje předała. Dalšich zajimcow njebě. Što ma so z ležownosću šamotownje stać, njeje jasne. Móžno, zo chce ju nowy wobsedźer do mjeńšich płoninow rozdźělić a firmam poskićeć.

Domowina přeproša serbske towarstwa a kulturne skupiny, so na klětušim Dnju Saksow w Plauenje předstajić. Hač do kónca oktobra móža so za to na internetnej stronje swjedźenja přizjewić. Dźeń Saksow njebudźe klětu kaž zwučene w septembrje, ale srjedź junija paralelnje z tradicionelnym měšćanskim swjedźenjom Plauena. Jězbne wudawki za serbske cyłki hodźa so přez Domowinu spěchować.