Уваров, Анатолий Николаевич
| Анатолий Николаевич Уваров | |
| Ужан удысэз: |
кылбурчи, литературовед |
|---|---|
| Вордӥськем нуналыз: | |
| Вордӥськем интыез: |
Куашкам гурт, Алнаш ёрос, УАО, Горький шаер, РСФСР, СССР |
| Кулон нуналыз: |
18-тӥ пӧсьтолэзе 2005 (72 арес) |
| Кулон интыез: | |
| Данъянъёсыз: |
И. Михеев нимо премия |
Анато́лий Никола́евич Ува́ров — тодмо удмурт кылбурчи, литературовед. Вордскемын 1933 аре 8 инвожое Удмурт автономи улосысь Алнаш ёросысь Юртошур-Какси (Куашкам) нимо гуртын. Сизьым аресъем школаез быдтэм бере Ижын киуж училищеын дышетскиз, собере — ужась егитъёслэн школаязы Глазын, огвакытэ Чупчи механика заводын токарь луыса ужаз. 1957 арысен Уваров ужаз Удмурт радиолэн пӧртэм редакциосаз: нырысь — берыктӥсь луыса, собере корреспондентлэсь но редакторлэсь ужзэ быдэсъяз. 1961 аре Удмурт университетысь историяя но филологияя факультетын вылӥ дышетскемзэ басьтӥз (заочно). 1966 аре со йылпумъяз Ленинградысь вылӥ партийной школалэсь журналистикая люкетсэ. 1967 арын со ужаз Удмурт книжной издательствоын, массово-политической литературая люкетэныз кивалтӥз.
1955 аре Уваровлы ӟеч ужамез понна «За трудовое отличие» нимо медаль сётӥллям. Удмурт АССР-ысь Вылӥ Кенешлэн Президиумезлэн Сӥё-дано грамотаеныз но пусъемын.
1969—1972 аръёсы Уваров Мускоын, СССР-ысь Наукаосъя академилэн дунне литературая институтаз аспирантураын дышетске. 1976 аре Уваров, «Художественное своеобразие удмуртской сатиры» темая диссетацизэ утьыса, филологи наукаосъя кандидат луиз. Аспирантураысь бертэм бераз Уваров УдНИИ-лэн литературая но фольклоръя сектораз ужаны кутскиз (старшой научной сотрудник, 1977 арысен — секторен кивалтӥсь).
Уваровлэн ужъёсыз сӥземын вал удмурт литературалэн историезлы, уката ик удмурт сатиралы. «История удмуртской советской литературы» шуыса нимам монографиезлы Уваров кык глава гожтӥз. Со сяна, со пыриз венгр литературоведлэсь Петер Домокошлэсь ӟуч кылэ берыктэм «История удмуртской литературы» нимо монографизэ тупатъян уже; мукет кунсьӧр литературоведъёслэсь но фольклористъёслэсь ужъёссэс но ӟуч кылэ берыктылӥз.
1984—1990 аръёсы Уваров — «Молот» журналлэн редакторез. 1993 арозь со кивалтӥз на РСФСР-ысь Калыкез дышетонъя министерстволэн йӧскалыко школаосъя научно-исследовательской институтэзлэн удмурт филиалэныз. Пенсие потыса, Уваров кунсьӧр литератураез удмурт кылэ берыктон борды басьтӥськиз: 2001 аре пичи тиражен потэмын солэн удмурт кылэ берыктэм «Калевалаез».
1993 аре солы «Удмурт Республикаысь культура удысын дано ужась» ним сётэмын вал.
Анатолий Уваров кулӥз Ижын, 2005 аре 18 пӧсьтолэзе.