E. A. Mario

Ermete Giovanni Gaeta, cchiù ncanusciuto comme E. A. Mario (Napule, 5 'e maggio 1884 - 24 'e giùgno 1961), è stato nu autore 'e paricchhie canzone 'e granne successo, deventate po'assaie famose e ca nun canosceno fine, come pe' aesempio La leggenda del Piave.

'E canzone fujeno scritte e musecate, cierte inte 'a lengua taliana, ate dinte 'a lengua napulitana; 'e chisti piezze, quase sempe, screveva sia 'e parole ca 'a museca.

È stato sicuramente uno fra 'e cchiù gruosse e mpurtante rappresentante d’’ a canzona napulitana d’’ a primma mità d’’ o Noviciento e uno de' prutaguniste prencepale d’’a canzona taliana da' primma uèrra munniàle nfino a ll'anne cinquanta, sia p’’a granne pruduzzione - ca era na cunzeguenza d’’a felice vena puoetica ca nun ferneva maje- ca 'a qualità 'e l' opere soje.

Biografia

Chillo ca po' addeventarrà, 'o famose E. A. Mario nascette 'a na mudesta famiglia salernitana ('o pate, Michele Gaeta, era barbiere e 'a mamma, Maria Della Monica, na casalinga), dinte a nu vascio 'e Vico Tutti i Santi, dinte a uno de' riune cchiù pupulari d’’a città, 'o rione Vicaria.

'O retoputèca d’’o pate era tutta 'a casa lloro. Nu lucale addò campaveno paricchie perzone 'e famiglia; 'o frate Ciccillo, 'e sore Agata e Anna, isso, 'a mamma e 'o pate. Dinte a n'ati ddojee stanzulelle, tre zie e nu zio.

’A fatica ê Poste

Quanno era ancora assaie guaglione, truvaie fatica dinte 'e Regie Poste Italiane a Napule, faticanno dinte a ll’ufficie ‘e Palazzo Gravina, zona ‘e Muntoliveto, ca era ‘a vecchia sede d’’e Poste Napoletane, addò già nu tiempo – cocche anne primma d’isso - faticaie comme telegrafista n'ata granne scrittrice napulitana, Matilde Serao.

Gaeta fuje assignato ô spurtiello d’’e raccumannate e d’’e vaglia, addò, doppo poco tiempo, facette n’ incontro furtunato. Nu juorno, ricanucette nnamze a isso, pecchè aveva liggiuto ‘o cugnomme comme mittente ‘e na raccumannata, ‘o musecista Raffaele Segrè, famoso cumpositore ‘e canzunette ‘e l'epuca. Cu ‘a sfruntatezza e ‘a sincerità propria d’’o carattere sujo, se truvaie a nce dicere: «Maestro, ‘e musiche voste so’ belle assaje ma ‘e parole... so’ 'na mezza fetenzia». ‘O musecista, risentito, steva quase p’’o risponnere malamente ma, ‘e tanta ggente presente dinte a chillu mumento e ‘e culleghe d’’o pueta, ca già ‘o canuscevano assaje bbuono, 'nce facetteno capì ca ‘o guaglione era assaje bravo pueticamente: «Prufessò, chisto è uno ca 'e poesia se ne ntenne!». ‘O maestro Segrè allora, pigliato ‘a n’istintiva simpatia, nce lanciaie na sfida: «Facimme na cosa, screviteme vuje ‘e parole, na poesia e io, si sarrà bella, ve nce metto ‘a museca». Fu accussì ca nascette ‘a primma canzone soja, Cara mamma, pubblecata d’’a Casa Editrice Ricordi.

Doppo, ô prencipio inizio d’’a primma uerra munniale, Gaeta avette ‘o trasferimento a Bergamo. Fuje proprio dinte a chesta cità ca accuminciaie ‘a prufessione 'e giurnalista pubblicista e l’attività soja ‘e pueta.

'O prencipio ‘e l'attività d’’o pueta

Grazzie a’ cultura soja ca era assaje vasta e ca s’aveva era custruito liggenno tante ma tanta libbre, era capace ‘e scrivere articule ncoppe a svariate argumente ca, po’ riusceva a pubblica’ dinte a diverzi giurnale. Da ‘e Poste fuje, doppo nu poco ‘e tiempo, alluntanato pe’ scarzo rennimento ma doppo nu poco d’anne, fuje riassunto e reintegrato, pecché tutte quante erano orgugliuse d’isso. Dinte ‘e Poste, fernette pe’ nce faticà pe’ tutta ‘a vita.

Fuje na perzona cu na granna cultura musecale e litteraria. ‘A generusità soja e ‘a granna dispunibilità, sempe senza nisciunu turnacunto, verso l’ata gente, ‘o carattere sujo e ‘a senzibilità soja, ‘o facetteno addeventà perzona degna e’ granna stima e ‘e profonno affetto, da parte ’e tutte chille c’avetteno occasione dò frequentà .

Fujeno paricchie ‘e perzone e l’artiste ca cercaieno e l’imità: pure ‘o granne attore Totò, o’ prencipio d’’a carriera soja, facenno ‘o tentativo ‘e cagnà genere ‘e spettaculo, screvette e recitaie "Vicoli", na parudia d’’a canzone "Vipera" ‘e E. A. Mario.

'A leggenda d’’o Piave

‘O 1918, dinte ‘a nuttata d’’o 23 'e giùgno, quase quanno steva pe’ fernì ‘a primma uèrra munniale, comme cunziguenza d’’a resistenza, ‘a rivincita straordinaria e ‘a vittoria taliana ncoppe ‘o Piave, screvette dinte uno appriesso a n’ato, ‘e vierze e ‘a musica d’’a canzone La leggenda del Piave, ca nce prucuraie ambresse ambresse na granna nuturietà, e facennolo addiventà famose specialmente tra ‘e surdate ‘e l’esercito taliano.

‘A canzone addiventaie quase subbeto l'inno nazziunale taliano, pecché rappresentave e cacciave fora tutta arraggia e l’amarezza p’’a scunfitta disastrosa ‘e Capuretto e l'orgoglio p’’a granna rivincita e ‘a vittoria ncoppe ‘o fronte veneto.

'O contranomme

‘O 1905, Ermete Giovanni Gaeta aduttaie p’’a primma vota ‘o contranomme ‘e E. A. Mario, ca po’ l’avesse purtato tanta furtuna, facennelo addiventà famoso pe’ tutto ‘o munno cu ‘e canzone soje.

‘O contranomme sujo d’arte E. A. Mario, è ‘a cumposizzione e ‘a somma e paricchie ccose scigliute. “E” piglia origgine d’’o vero nomme sujo, Ermete; “A” fuje scegliuta comme segno ‘e ricanuscimento e stimma verzo Alessandro Sacheri, poeta e amico sujo, quase nu frate, e pure caporedattore d’’o giurnale Il lavoro ‘e Genuva, ca le pubblicaie ’e primme ccose soje ‘e scrittore. Mario steva a vulè significà ‘o patriota Alberto Mario, ca fuje ‘o perzunagge d’ ‘a giuvinezza soja, ca isso guardava cumme aesempio, tenenno na granna passione pe’ Giuseppe Mazzini e, forze, pure pecché nce piaceva ‘o contranomme ca ausava pe se firmà, ’a poetessa polacca, direttrice d’’o giurnale Il Lavoro ‘e Genuva, Maria Clarvy.

‘O contranomme sujo fuje ausato p’’a primma vota ‘o 1905, dinte ‘a pubblecazzione ‘e cierti canzone soje, cu l’editore Ricordi ‘e Milano.

Libbre ca parlano d’isso

Ettore De Mura, Enciclopedia della Canzone Napoletana, Il Torchio, Napule, 1969
Ettore De Mura, Poeti napoletani dal Seicento ad oggi, Marotta Editore, Napule, 1977
Libro di Famiglia N° B1, Biblioteca Nazziunale ‘e Napule, Deposito Lucchesi-Palli
Max Vajro, E. A. Mario, 1984, a cura d’’o cumitato pe’’e celebrazzione d’’o centenario d’’a nascita ‘e E. A. Mario, vuluto d’’o Ministero d’’e Poste e Telecomunicazzioni
Bruna Catalano Gaeta, E. A. Mario (Leggenda e Storia), Liguori Editore, Napule, 1989
Salvatore Palomba, La Canzone Napoletana, L’ancora del Mediterraneo, Napule, 2001
Ottavio Nicolardi, Funtane e funtanelle – E. A. Mario, Morano Editore, Napule, 1984
Maurizio Becker, La canzone napoletana, Octavo, Firenze, 1999
Aldo De Gioia, Frammenti di Napoli, RCE Edizzione s.r.l., Napule, 2000
Giovanni Capurro, Carduccianelle, Istituto Grafico Editoriale Italiano
Celebri canzoni napoletane ed italiane di E. A. Mario, Bideri, Napule, 1984
Vittorio Paliotti, Storia della canzone napoletana, Newton & Compton Editori, Romma 2004

L’opere soje

Chhiù ‘e 2.000 canzone
Acqua chiara (poesie, allustrazzione 'e E. A. Macchia), Matelda
Cerase (sunette), Ed. Remo Sandron
Vangelo (poesie), Albrighi-Segati & C.
Il libro grigioverde (raccolta ‘e canzone ‘e trincea), Ed. E. A. Mario, Napule
Parentali (poema storico-musecale inte a duje atte), Ed. E. A. Mario, Napule
’E rrose (atto unico 'n dialette, allustrazzione 'e P. Scoppetta e G. Spagnolo), Bideri, Napule
Albero piccerillo (poesie), Ed. Chiurazzi, Napule, 1930
Funtane e funtanelle, Morano
’A storia d’’o core, Istituto Grafico Editoriale Italiano
All’insegna della Sirena, Ed. Chiurazzi, 1930
Cunfiette (poemetto autobiografico), Matelda
Cunfessione (poemetto, presentazzione ‘e A. Costagliola), Matelda
’A Morte (poemetto, allustrazzione 'e Amos Scorzon), Matelda
Mamme (quattre atte 'n dialette, allustrazzione 'e E. A. Macchia), Matelda
’O Quarantotto (poemetto)
Il fu Pulcinelle
’O libro d’’e canzone