陳欣健太太張蓉蓉患認知障礙 視為BB般照顧：有幾秒鐘開心就安慰
發佈時間：14:00 2024-05-01
79歲陳欣健的太太是60年代邵氏女星張蓉蓉（尤情），在1973年與陳欣健結婚後淡出娛樂圈，育有陳早茵和陳早怡後，一直專心相夫教女，不過在10多年前張蓉蓉被診斷患認知障礙症，陳欣健悉心照顧太太，近日陳欣健接受TVB節目《早D知早D醫》訪問，分享照顧太太的經歷及感受。
相關閱讀：陳欣健79歲生日群星開P！當年獲首位金像影帝邀轉行 相隔半世紀依然老友
陳欣健太太張蓉患認知障礙症：
在今晚（1日）播出的第六集，「愛妻號」陳欣健分享照顧患認知障礙症太太張蓉蓉的經歷，陳欣健指太太曾離家出走及忘記關爐頭，又指太太試過瞓到半夜，突然走到客廳將所有相簿拿出來，但卻不知道自己在做甚麼。陳欣健坦承需要24小時貼身照顧患病太太，是最困難的一點，而且除了患者本人，還要照顧患者身邊人的感受。當日女兒得知媽媽不認得自己後，確實受到打擊，陳欣健則擔當「心理輔導」及緩衝的角色。陳欣健還表示為博紅顏一笑，他不時陪太太打麻雀及為太太播放懷舊金曲：「有幾秒鐘睇得出佢真係開心，已經帶畀我好多安慰。」
陳欣健曾因緋聞不斷令太太不開心
陳欣健曾在訪問上表示，因為工作關係而緋聞不斷，太太一定會不開心：「我成日唔喺屋企又好多緋聞，太太一定唔開心。我多謝佢嘅容忍，佢使我反思，佢亦知道我珍惜屋企。」太太被診斷患認知障礙症後，陳欣健專心照顧太太：「每次返屋企都會同佢講佢『我返嚟喇，我係你老公！』我又會陪佢睇卡通片，有時又會好似錄音機咁，一個問題問上100次，但我都會笑住咁答佢，算係苦中作樂，但求佢有5秒嘅清醒微笑，我都會好開心！」
陳欣健女兒和弟弟陳國新先後加入娛樂圈：
陳欣健稱當時對這個病認知不足，結果忽略了太太發出的「訊號」：「嗰陣以為佢撒嬌發小姐脾氣，刻意放大問題想得到多啲關注同愛錫，之後開始係唔記得啲嘢擺咗喺邊，打麻雀亦唔識得計數，之後情況越嚟越嚴重，試過冇帶銀包就走咗出去，蕩失路唔識返屋企。」結果陳欣健帶太太接受相關檢查後，證實太太患了認知障礙症。
陳欣健表示太太情況穩定並活在自己的世界
陳欣健亦曾表示太太目前情況穩定，活在自己的世界，懂得自己食嘢，但因不會主動說話，陳欣健會花點心思令太太安全：「好彩搵到工人姐姐幫我手，屋企又裝咗所有可以幫助照顧太太嘅護理儀器，總之中由起身到瞓覺，確保佢唔會跌倒引致併發症，亦唔會自己走出街失蹤。」陳欣健又稱一有空就會唱歌哄太太：「佢只係返老還童，成為需要我照顧嘅BB，只要見到佢笑，我就快樂。」
其他文章：
《逃學威龍》中史老師竟是陳欣健胞弟？陳國新已變慈祥老人 與林子祥極老友
阿Sa蔡卓妍與「翻版蘇施黃」撐枱腳？ 驚揭是佘詩曼星二代經理人背景驚人
------------------------------
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
