Ian陳卓賢 情人節同媽咪過 罕談愛情觀自爆偏向「一見鍾情」:第一眼就知想唔想長遠發展
2024-02-15 18:45 
MIRROR成員陳卓賢（Ian）昨天情人節(14日）推出以愛情故事貫穿的Chapter 1 作品《Lost at First Sight》，並請來許恩怡拍攝MV，飾演其傾慕對象，新歌更以電結他創作出厚實Funky Style。昨晚，Ian 在IG 開live 宣傳新歌，與網民大玩「你問我答」，當中更自爆鍾意「一見鍾情」的感覺。
Ian 坦言新歌以小電影劇情去發展，故事系列的Chapter 1 主要講及在聯校舞會一見鍾情的故事，給大家一個青春單純的愛情；而歌名以「lost 」來取替「love」，Ian笑言是他一意孤行的意思：「係幾十個歌名選擇裡面，其實我係一意孤行用呢個歌名，冇聽大家嘅投票，呢個lost字係比較正面，即係第一次見到你就已經迷失左嘅意思，充滿電影浪漫嘅感覺。」當粉絲們不斷追問有冇Chapter 2的時候，Ian 起初大賣關子表示：「大家唔好咁心急，人生就係唔知將來先至有趣」，但Ian 在粉絲再三逼供下，最後透露Chapter 2 已經寫好，而MV大方向亦已經有了。
適逢昨日情人節，Ian 被問到怎樣過? 他表示情人節是一年一度與媽咪過的日子，並透露：「晏晝同媽咪去咗飲茶，之後行街買情人節禮物俾佢，但係夜晚遲咗約媽咪，媽咪已經full Booking。」
被網民問到是否嚮往一見鍾情？Ian 就罕談自己的愛情觀，自爆偏向一見鍾情：「諗返以往自己，我係偏向一見鍾情類多過日久生情類，譬如你一開始見到呢個人個感覺，其實第一眼就取決到你會唔會想同佢長遠發展，或者佢係你心裡面嘅感覺，所以我偏向一見鍾情。」Ian 更表示學生年代從未有參加聯校舞會，他表示：「我由細到大都冇參加過任何一個聯校舞會，因為我啲時間拎晒去練波，以前星期一至六都係練波，星期日就打比賽，我冇太大興趣參加舞會，因為舞會全部都係陌生人。」
今次新歌繼續由Ian 親自作曲，他特別揀選了人生第一支結他登場，「呢支結他陪咗我好耐，唔夠20歲嗰陣買，嗰陣時係彈結他最勤力、最着迷嘅時間，反而入行之後彈結他嘅時間非常少，所以而家想彈返。」提到創作靈感，Ian 坦言這亦是導致他長期失眠的原因：「因為臨瞓前諗到一樣嘢，我就一定要諗到解決方法，或者不停諗點解會咁樣，導致成日失眠，但我覺得呢一個係我性格一個特質，係工作上都係一個好處。」他更透露了一些作詞的小習慣，「我多數用電話寫，多過用手寫，因為容易儲存，加上我啲字好核突。」有人叫Ian分享演唱會感受，不過Ian 就表示太煽情，怕自己控制不住情感；在直播結束前， Ian搞笑拎起結他彈了幾下落堂的鐘聲，表示直播結束。
入行前Ian多以結他創作歌曲，但成為歌手後反而少了， Ian道：「自己本身係彈開結他，入行前好多創作都係用結他寫，近年作品反而少咗呢個元素，所以就有呢隻歌誕生。今年推出嘅歌曲，會攞返呢支寶劍擺喺自己身邊。」為了讓大家可以見識每支結他的靚樣與靚聲，Ian打算每首歌都會讓不同的結他登場。除了有不同的結他登場，Ian今年的作品，都會以系列形式推出，他說：「用故事性貫穿，形容一段關係唔同嘅Stage，由初相識、發展到Ending會係點。好多人會睇究竟係Happy Ending定係Sad Ending，但呢要賣關子，因為未完全肯定故事嘅句號係屬於點樣一個Ending，大家要多加留意。」
因為喜歡結他，所以為每一支結他寫一首歌，Ian鍾情結他的佐證在今次新歌MV現場也有跡可尋，他悄悄透露：「而家科技發達，好容易買到嘢。啱啱拍緊MV彈緊結他，同啲朋友又傾開啲結他，喺網上突然見到一支幾靚，於是又納入即將收藏系列。未喺我度，但我會帶佢返屋企，可能係之後其中一首歌嘅主角，但我都幾肯定呢支新結他，嚟緊開Show大家會見到佢嘅出現。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應