Obesidat

Una muller obesa

A obesidat ye a condizión d'o cuerpo en a cuala la cantidat de grasa acumulata tien un riesgo ta la salut, reduzindo a esperanza de bida d'o indibiduo. Á lo largo d'a istoria la delimitazión d'o conzeuto d'obesidat ha ito cambeyando: bellas culturas e relichions la consideraban como un sinno de riqueza e felizidat e no la teneban como una amenaza ta la salut.

D'atra man bellas étnias, como por exemplo los polinesios, tienen gran propensión á la obesidat mientres que en atras como la chinesa cuasi no tienen ista condizión.

A cultura rezient d'os países ozidentals ha presentato como modelo más deseyable a fegura delgada e iste conzeuto s'ha difundito amplament en totas as artes e a publizida, prebocando uns efeutos psicolochicos adbersos en as presonas con sobrepeso u obesos. Han aparexito asoziazions d'obesos que han reazionato cuentra lo que consideran una presión cuentra la suya condizión e reibindican a normalidat d'a obesidat.

A inzidenzia d'o sobrepeso e a obesidat sobre a poblazión mundial ha rechistrato un gran aumento á partir d'a decada de 1980 e se considera, por exemplo en os Estatos Unitos, como lo periglo más grieu ta la salut d'os ziudadans.